Elimizde jol júrisi qaýipsizdiginiń aýdıt ınstıtýty engiziledi
ASTANA. 12 aqpan. QazAqparat - Aldaǵy ýaqytta elimizde jol júrisi qaýipsizdiginiń aýdıt ınstıtýty engiziledi. Bul týraly búgin Parlament Májilisinde «Jol júrisi týraly» jańa zań jobasy boıynsha baıandaǵan Іshki ister mınıstriniń orynbasary Erlik Kenenbaev málim etti.
«Zań jobasynyń basty jańalyqtarynyń biri - jol-kólik oqıǵalarynyń oryn alý táýekelin týdyratyn aqaýlardy erte anyqtaý maqsatynda joldar men avtokólikterdiń tehnologııalyq daıyndyǵyn qadaǵalaý. Osyǵan oraı, daıyndyq saraptamasyn ótkizetin jol júrisi qaýipsizdiginiń aýdıti ınstıtýtyn engizý qarastyrylýda. Aýdıt ınstıtýty negizinen der ýaqytynda ózgerister engizý úshin jobalaý kezeńinde nemese qurylystyń bastapqy kezeńderinde joldyń tehnıkalyq jobasyndaǵy qaýipsizdik qaýpin anyqtaýǵa múmkindik beredi. Al saraptama barysynda usynylatyn jańa nemese jańartylǵan jol ashylǵannan keıin ony paıdalaný deńgeıi baǵalanady», - deıdi mınıstrdiń orynbasary.
E. Kenenbaevtyń aıtýynsha, aýdıt ınstıtýtyn engizý qaýipsizdikti arttyrýǵa qatysty shyǵyndardy edáýir únemdeýge septigin tıgizedi. Óıtkeni, ondaǵy tájirıbeler jol salý aıaqtalǵannan keıin emes, jol qurylysy barysynda eskeriletin bolady. Bundaı ınstıtýttyń tıimdiligi álemdik tájirıbelerde de baıqalǵan. «Jalpy álemdik tájirıbege súıensek, jol salynyp, ol qoldanysqa berilgennen keıin bir nárseni ózgertýden góri onyń kemshilikterin jobalaý nemese qurylysyn salý kezeńinde joıýdyń edáýir arzan bolatynyn aıǵaqtaıdy», - deıdi E. Kenenbaev.
