Elimizde jol salasyna orta eseppen 3 myńǵa jýyq maman kerek

AQTAÝ. QazAqparat – Elimizde jol salasyna orta eseppen 3 myńǵa jýyq maman qajet. Ásirese, jol sheberleri, ınjener-smetashylar, zerthanashylar, jol qurylysy ınjenerleri, avtogreıder júrgizýshileri, mehanızatorlar, taǵy basqa da mamandyqtar boıynsha adam jetispeıdi, dep habarlaıdy QazAqparat tilshisi Mańǵystaý oblysynyń Jol aktıvteriniń ulttyq sapa ortalyǵy fılıalyna silteme jasap.

Fılıal dırektory Eltaı Taıalıevtyń aıtýynsha, «1000 mektep» jobasy aıasynda 2020 jyldan bastap túlekterdiń arasynan jyl saıyn eń kemi 2-3 bala jol salasy mamandyǵyn tańdaıtyn bolsa, 10 jylda osy baǵyttaǵy maman tapshylyǵy joıylady.

«Byltyrǵy jyly «Jol aktıvteriniń ulttyq sapa ortalyǵy» RMK basshylyǵy «1000 mektep» bastamasyn júzege asyrýdy qolǵa aldy. Maqsat - mektep bitirýshi túlektermen kezdesip, jolshy mamandyǵyna tartý. Mańǵystaý oblysynda 154 mektep bar. Aımaqta karantındik shekteý sharalary engizilgenge deıin 26 orta bilim berý mekemesi qamtyldy. Jol sapasyn baqylaýshylar Aqtaýdan bólek Munaıly men Túpqaraǵan aýdanyndaǵy mektepterge bardy», - dedi MO «Jol aktıvteriniń ulttyq sapa ortalyǵy» RMK fılıal dırektory Eltaı Taıalıev.

Kóp jaǵdaıda oqýshylardy mektep bitirgen soń qandaı oqý ornyna túsýge bolatyndyǵy alańdatady. Qazaqstanda jol salasy boıynsha mamandardy daıarlaýmen 30-jýyq ýnıversıtet pen 50-ge tarta kolledj aınalysady.

Qatarynda Sh.Esenov atyndaǵy Kaspıı memlekettik tehnologııalar jáne ınjınırıng ýnıversıteti men H.Ózbekǵalıev esimi berilgen polıtehnıkalyq kolledj bar.

Kolledjdiń 2 stýdenti aı saıyn 60 myń teńgeden joǵary shákirtaqy alyp, Aqtaýdaǵy fılıalynda kásibı biliktiligin arttyryp júr. Oqýyn bitirgen soń ujymǵa qosylady dep kútilýde.