Elimizde jol máselesi qalaı sheshilip jatyr

ALMATY. QazAqparat - QR Indýstrııa jáne ınfraqurylymdyq damý vıtse-mınıstri Berik Kamalıev Almatyǵa kelgen saparynda elimizdegi joldardyń máselesi jaıynda aıtyp berdi, dep habarlaıdy QazAqparat tilshisi.

«Elimizdiń joldaryna qatysty syn únemi aıtylatyny ras. Ol - merdiger kompanııalardyń jibergen olqylyqtary. Biz olardy joıý úshin búginde tıisti jumys júrgizip jatyrmyz»,-dedi vıtse-mınıstr.

Berik Kamalıev sondaı-aq, jobalyq-smetalyq qujattardy sapaly daıyndaý qajet ekenin aıtty.

«Mysaly, Qazaqstannyń ár óńiriniń klımaty ártúrli. Jobalyq-smetalyq qujattardy daıyndaǵanda sony eskerý kerek. Osy máselege baılanysty biz jol salasynda eńbek etip júrgen kompanııalarǵa, merdigerlerge, jobalyq ınstıtýttarǵa tıisti tapsyrmalar beremiz»,-dedi ol.

Vıtse-mınıstrdiń aıtýynsha, jergilikti jerlerde, oblystyq, aýdandyq joldarda, qala ishindegi joldarda kóp másele bar.

Ol máselelerdi sheshý úshin QR Úkimeti bul joldardyń sapasyn respýblıkalyq deńgeıge jetkizý týraly tapsyrma bergen.

«Osyǵan oraı «Jol aktıvteriniń ulttyq sapa ortalyǵy» qurylǵan. Endi osy ortalyq arqyly respýblıkalyq mańyzy bar joldardan bólek, oblystyq, aýdandyq, jergilikti jerlerdegi joldardyń da sapasyn qadaǵalaıtyn bolamyz. Biz sondaı sheshim qabyldadyq»,-dep atap ótti ol.