Elimizde jol-kólik oqıǵalarynyń ósýine avtokólik parkiniń artýy da áser etýde - QR ІІM
ASTANA. 29 qazan. QazAqparat - Jyl basynan beri 15 myń jol-kólik oqıǵalary boldy. Bul kórsetkish ótken jylǵa qaraǵanda 60 paıyzǵa jýyq deńgeıge joǵary. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi baspasóz máslıhatynda QR ІІM Ákimshilik polıtsııa komıtetiniń tóraǵasy Igor Lepeha aıtty.
Onyń sózine qaraǵanda, osy ahýaldyń birqatar sebepteri bar. Máselen, sońǵy jyldary elimizde avtokólik parki kúrt artyp otyr. 2007 jyly 2 mıllıonnan astam avtokólik bolsa, búginde kólik sany 4 mln.100 myńǵa jetip otyr. Osy oraıda komıtet basshysy respýblıkadaǵy jol ınfraqurylymy ótken ǵasyrdaǵy kólik aǵymyna eseptelgenin, al qazirgi kezde tıisti talaptarǵa sáıkes kelmeıtindigin sóz etti.
«Qalalardaǵy ınfraqurylymdar boıynsha kemshin tustar barshylyq. Atap aıtqanda jer asty jáne jer ústi jaıaý júrginshiler ótkelderi óte az. Qalalardaǵy kóshelerdiń eni boıynsha máseleler bar. Sonymen qatar respýblıkalyq jáne jergilikti mańyzdaǵy joldarǵa qatysty jasaıtyn sheshimder kerek. Búginde joldar jóndelip, jaqsy joldar salynýda. Alaıda, tıisti ınfraqurylym men qaýipsizdik jaǵdaılary qalys kele jatyr. Sondyqtan da bul sebep-saldar joldarda apattylyqtyń artýyna alyp keledi»,-dedi ol.
I. Lepeha jer asty jáne jer ústi jaıaý júrginshiler ótkelderi negizinen Astana men Almaty qalalarynda qamtylǵanyn, al qalǵan oblys ortalyqtarynda joqtyń qasy ekenin sóz etti.
Esterińizge sala keteıik, bıylǵy 11 qazanda QR Úkimetiniń keńeıtilgen otyrysynda Elbasy Nursultan Nazarbaev jol-kólik oqıǵalary saldarynan adamdardyń mert bolýy kórsetkishteriniń ósýine alańdaýshylyq bildirgen edi.
«Qarańyzdar, ótken jyly joldarda 2145 adam qaza tapty. Osy jyldyń 9 aıynda 2273 adam mert boldy», - dedi QR Prezıdenti otyrys barysynda. Al jaraqat alǵandar - 22 myńǵa jetken.
Sonymen qatar Elbasy jol erejesin buzýshylarǵa qatysty zań talaptaryn kúsheıtý qajettigin basa aıta kele: «Rólge mas kúıinde otyrǵan júrgizýshi - qylmysker. Ony bizde bar zańmen barynsha qatań jazalaý kerek nemese bul zańdardy kúsheıtý qajet», - dedi.
Osy rette QR Іshki ister mınıstri Q.Qasymov qazirgi zańǵa sáıkes jaza qatańdatylǵandyǵyn basa aıtty.
«Qaýipsizdik keńesimen bizderge taǵy ne isteý kerektigin oılastyr. Bul - baryp turǵan tártipsizdik. Adamdardan aıyrylýdamyz. Biz mynda olardy emdep, olardyń sanyn ári ómir súrý uzaqtyǵyn arttyrǵymyz keledi. Al jolda olar mert bolýda»,- dedi Elbasy.
