Elimizde joǵary deńgeıli «Altyn sapa» baıqaýyna daıyndyq jumystary júrip jatyr
ASTANA. Shildeniń 9-y. QazAqparat /Aıdar Ospanalıev/ - Osy ýaqytta elimizdiń barlyq aımaqtarynda joǵary deńgeıdegi «Altyn sapa» baıqaýyna daıyndyq jumystary qyzý júrip jatyr. Aımaqtarda shaǵyn jáne orta bıznes pen qoǵamdyq uıym ókilderi arasynda jáne jergilikti atqarýshy organdarǵa arnalyp, semınarlar uıymdastyrylýda.
Indýstrııa jáne jańa tehnologııalar mınıstrliginiń málimetterinshe, atalmysh kezdesýler barysynda «Altyn sapa» baıqaýyn uıymdastyrýshylar bıylǵy jylǵy konkýrs pen onyń aıasynda uıymdastyrylatyn «Qazaqstannyń úzdik taýary» atty kórme baıqaýynyń erekshelikterimen jáne jańalyqtarymen tanystyrmaqshy. Semınarda sondaı-aq qazaqstandyqtarǵa tenıkalyq retteý men menedjment, Biryńǵaı ekonomıkalyq keńestikti qurý men Kedendik Odaqqa qatysty túıtkildi máseleler jóninde de keńirek túsinik beriledi.
Atalmysh sharany uıymdastyrýǵa Indýstrııa jáne jańa tehnologııalar mınıstrliginiń Tehnıkalyq retteý men metrologııa komıteti departamentiniń oblystyq departamentteri muryndyq
bolyp otyr. Oǵan sondaı-aq oblystyq ákimdikter de qolǵabys etýde. Semınarlar osy ýaqytta Qostanaı, Qyzylorda, Aqtóbe, Oral, Pavlodar qalalarynda uıymdastyrylyp úlgerdi. Al shildeniń sońyna deıin shara elimizdiń barlyq aımaqtarynda ótedi. Semınardyń kún tártibi boıynsha, Tehnıkalyq retteý men metrologııa komıtetiniń, oblys ákimdikteriniń, Qazaqstannyń standarttaý men sertıfıkattaý jáne Metrologııa ınstıtýttarynyń sondaı-aq Ulttyq akkredıtatsııalaý ortalyǵynyń ókilderi sóz sóıleıdi. Semınardyń basty maqsaty qazaqstandyq naryqty joǵary sapaly, básekege qabiletti taýarlarmen qamtamasyz etip, memlekettik organdar men óndiris kompanııalarynyń, kommertsııalyq jáne qoǵamdyq uıym ókilderiniń nazaryn sapa máselesin sheshýge jumyldyrý bolyp tabylady.
