Elimizde JITS-ke shaldyqqan naýqastar preparattarmen tolyq qamtylǵan
ASTANA. QazAqparat - Búgingi tańda Qazaqstanda densaýlyq saqtaý júıesinde AITV/JITS shaldyqqan naýqastar retrovırýsqa qarsy preparatttarmen 100% qamtamasyz etilgen. Naýqastardyń ómir súrý sapasyn jaqsartý, áleýmettik ortaǵa qaıta oraltý úshin Dúnıejúzilik densaýlyq saqtaý uıymy usynǵan jańa standarttar boıynsha emdeý sharalaryn engizý jumystary jalǵasýda.
Bul týraly QR DSÁD mınıstrliginiń baspasóz qyzmeti habarlady. Sondaı-aq Qazaqstan AITV taralýy boıynsha jahandyq básekege qabilettik ındeksi reıtıngisinde 45-ten 1 orynǵa kóterilgen. Degenmen shetelderden kelgen mıgranttardy retrovırýsqa qarsy terapııamen qamtamasyz etý máselesin zańnama deńgeıinde sheshý kerek.
Sonymen birge halyqtyń áleýmettik osal toptaryna, ıaǵnı esirtki tutynýshylaryna, kommertsııalyq seks ókilderine, gomoseksýaldarǵa qatysty jumystar júrgizilýde. Eń aldymen aldyn alý baǵdarlamalarmen qamtý úshin atalǵan toptardyń naqty sanyn anyqtaý qajet delingen baspasóz habarlamasynda.
Bul - shprıtster men ınelerdi aýystyrý; opıoıdty oryn almastyrýshy terapııany qoldaný arqyly nashaqorlyqqa táýeldilikten emdeý; AITV-ke qatysty testileý jáne keńes berý; qaýip-qaterdi tómendetý úshin aqparattandyrý, bilim jáne keńes berý; jynysqappen qamtamasyz etý. Kórsetilgen is-sharalar úkimettik emes uıymdarmen birlesip iske asyrylady. AITV-pen ómir súretin azamattar arasynan aýtrıch qyzmetkerler jumyldyrylady. Aqparattandyrý sharalary jalǵasady.
Dúnıejúzilik densaýlyq saqtaý uıymynyń jiktemesi boıynsha Qazaqstan AITV/JITS indetiniń shoǵyrlanǵan satysynda (ortasha álemdik kórsetkish 1,1 % bolǵanda halyqtyń 0,2 %-y). Halyqaralyq sarapshylardyń baǵalaý derekteri boıynsha Qazaqstanda AITV aýrýy bar turǵyndardyń sany 16 myń adamdy quraıdy, bul tirkelgenderdiń sanynan 2 esege jýyq artyq. AITV juqtyrǵandardyń jalpy sanynyń shamamen 1/4-in quraıtyn AITV juqtyrǵan áıelderdiń sany ósýde. 2008 jyly júkti áıelder arasynda AITV juqpasynyń jıiligi 2005 jyldan bastap jyl saıyn 0,01 %-ǵa arta otyryp, 0,07 %-dy qurady, bul AITV-nyń anadan balaǵa berilý yqtımaldylyǵyn arttyrady. Sonymen qatar, halyqtyń AITV/JITS týraly habardar bolýynyń tómendigi osy patologııa boıynsha jaǵdaıdyń nasharlaýynyń naqty qaýiptiligine yqpal etedi.
