Elimizde jerge zertteý júrgizetin memlekettik ınstıtýt quryldy

ASTANA. QazAqparat - Aýyl sharýashylyǵy mınıstrliginiń janynan jerge ekonomıkalyq baǵalaý júrgizip, monıtorıng jasaıtyn ınstıtýt quryldy. Premer-Mınıstr Álıhan Smaıylov tıisti Úkimet qaýlysyna qol qoıdy, dep habarlaıdy QazAqparat tilshisi.

«Aýyl sharýashylyǵy mınıstrligi Jer resýrstaryn basqarý komıtetiniń «Jerlerge zerttep - qaraý jumystaryn júrgizý jónindegi memlekettik ınstıtýt» sharýashylyq júrgizý quqyǵyndaǵy respýblıkalyq memlekettik kásiporny qurylsyn. Kásiporynnyń mindeti – jerdi ekonomıkalyq baǵalaý, oǵan monıtorıng júrgizý, topyraqty zertteý, geobotanıkalyq, agrohımııalyq zertteýlerdi jáne topyraqty baǵalaýdy júrgizýdi qamtıtyn jerlerdiń sapasyn esepke alý», - delingen Álıhan Smaıylov qol qoıǵan Úkimet qaýlysynda.

Sonymen qatar, tıisti qaýlymen Aýyl sharýashylyǵy mınıstrligine tikeleı baǵynatyn myna qurylymdar endi Jer resýrstaryn basqarý komıtetine berildi:

- Respýblıkalyq agrohımııa qyzmetiniń ǵylymı-ádistemelik ortalyǵy;

- Aımaqtyq gıdrogeologııalyq-melıoratsııalyq ortalyǵy;

- Ońtústik Qazaqstan gıdrogeologııalyq-melıoratsııalyq ekspedıtsııasy;

- Qyzylorda gıdrogeologııalyq-melıoratsııalyq ekspedıtsııasy.

Qaýly qol qoıylǵan kúnnen, ıaǵnı 6 qyrkúıekten bastap kúshine endi.