Elimizde jer qoınaýyn paıdalaný quqyǵyn berýge 40 aýktsıon jarııalandy

NUR-SULTAN. QazAqparat – Qazaqstanda kómirsýtek boıynsha jer qoınaýyn paıdalanýǵa arnalǵan 281 kelisimshart bar. Bul týraly QR Energetıka vıtse-mınıstri Ashat Hasenov málim etti, dep habarlaıdy QazAqparat tilshisi.

«Búgingi tańda kómirsýtek boıynsha jer qoınaýyn paıdalanýǵa arnalǵan 281 kelisimshart jasaldy. Onyń ishinde barlaý boıynsha 40 kelisimshart, barlaý men óndirý - 135, tek óndirý – 96 jáne ónimdi bólý týraly 10 kelisimshart bar. 2020 – 2021 jyldary jer qoınaýyn paıdalaný boıynsha geologııalyq barlaýǵa shamamen 174,0 mlrd teńge ınvestıtsııa quıyldy. Jekelep aıtqanda 2020 jyly – 95,0 mlrd teńge, al 2021 jyly – 79 mlrd teńgeni quraıdy», - dedi Ashat Hasenov QR Parlamenti Májilisinde ótken geologııa salasyn damytý taqyrybyna arnalǵan dóńgelek ústel barysynda.

Vıtse-mınıstrdiń aıtýynsha, geologııalyq barlaýǵa ınvestıtsııa tartý úshin jer qoınaýyn paıdalaný quqyǵyn berýge arnalǵan aýktsıon ótip turady.

«Aýktsıon tolyq avtomattandyrylǵan jáne elektrondyq alań arqyly áleýetti ınvestorlardyń qatysýymen ótedi. Bıyl 21 sáýirde bizdiń mınıstrlik kómirsýtekter boıynsha jer qoınaýyn paıdalaný quqyǵyn berýge kezekti 40 aýktsıon jarııalady. Barlyq usynylǵan jer qoınaýy ýchaskeleri boıynsha jıyntyq soma 2,9 mlrd teńgeni qurap otyr», - deıdi ol.

Odan bólek, mınıstr orynbasary bıyl 22 shildede taǵy aýktsıon ótetinin aıtty.