Elimizde jer qoınaýyn ıgeretin kompanııalardyń ashyqtyǵyn arttyrýǵa baǵyttalǵan memorandým jasaldy
QR Prezıdenti janyndaǵy sheteldik ınvestorlar Keńesiniń 2016 jyldyń 27-mamyrynda ótken plenarlyq otyrysynda qabyldanǵan jańa bırjalyq ınfraqurylymdy jáne jer qoınaýyn ıgeretin kompanııalardyń jeke bırjalyq alańyn qurý týraly sheshimine sáıkes, búgin «Astana» Halyqaralyq qarjy ortalyǵy, QR Investıtsııalar jáne damý mınıstrligi jáne QR Energetıka mınıstrligi yntymaqtastyq týraly memorandýmǵa qol qoıdy.
Qujat boıynsha taraptar jer qoınaýy salasynyń damýyna, onyń ishinde jer qoınaýyn ıgeretin kompanııalardyń ashyqtyǵyn arttyrý men olardyń qyzmetiniń aldyn-ala boljanýyna qatysty yntymaqtasyp jumys isteıtin bolady. Buǵan qosa, paıdaly qazbalardyń qory esebine halyqaralyq standarttar júıesin engizýge, uzaqmerzimdik kapıtal naryǵyn damytýǵa (onyń ishinde orta jáne kishi kapıtalızatsııaǵa ıe kompanııalar), jer qoınaýyn ıgeretin qazaqstandyq kompanııalardyń arasynan jańa klastaǵy emıtentterdi qurýǵa jáne Qazaqstan Respýblıkasyndaǵy jer qoınaýyn ıgerý salasyndaǵy ınvestıtsııalyq klımattyń jaqsarýyna yqpal etedi.
AHQO Basqarýshysy Q.Kelimbetovtiń aıtýynsha, AHQO bazasynda qurylatyn bırjalyq alań shaǵyn jáne orta kapıtalızatsııaǵa ıe kompanııalar men paıdaly qazbalardy zertteýmen aınalysyp jatqan kompanııalarǵa (junior mining companies) AHQO qundy qaǵazdar naryǵy arqyly úlestik jáne boryshtyq qarjylandyrý quraldaryn tartýǵa múmkindik beredi.
Óz kezeginde Investıtsııalar jáne damý mınıstri J.Qasymbek, «úshjaqty kelisim jer qoınaýyn ıgerý salasyn damytý boıynsha Elbasynyń alǵa qoıǵan tapsyrmalaryn sátti júzege asyrýǵa jáne AHQO bırjalyq alańy arqyly jer qoınaýyn ıgeretin kompanııalardy qarjylandyrýdyń tıimdi kózin tabýǵa yqpal etedi»,- dedi.
Energetıka mınıstri Q.Bozymbaev Qazaqstanda paıdaly qazbalardy, onyń ishinde kómirsýtekti shıkizatty óndirý jáne óńdeý boıynsha belsendi jumys júrgizilip jatqanyn aıtty. Mınıstrdiń aıtýynsha, Qazaqstan munaı men gazdyń úlken qorlaryna ıe. Elimizde 200-den astam kenish bar. Budan da basqa kóptegen kenishter zerttelýde. Kenishterdi sátti zertteý jáne óńdeý aıryqsha kapıtaldy qajet etedi. Demek, bul - jer qoınaýyn ıgerýshi kompanııalardy qarjylandyrý quraldarynyń qajettigin kórsetedi.
