Elimizde jeńil ónerkásiptegi ónim kólemi ósti
NUR-SULTAN. QazAqparat - 2019 jylǵy qańtar-maýsymda Qazaqstanda jeńil ónerkásip ónimderin óndirý kólemi 16,7 paıyzǵa artty, dep habarlaıdy QazAqparat tilshisi.
«Toqyma buıymdarynyń naqty kólem ındeksi (NKI) 120,5% – ti, kıim – 108,4% - ti, bylǵary jáne oǵan qatysty ónimder-97,2% - ti qurady. Maqta talshyǵy, daıyn toqyma buıymdary, syrtqy kıim óndirisin ulǵaıtý esebinen toqyma buıymdary men kıim óndirisinde ósý baıqalady. Bylǵary jáne oǵan qatysty ónimder óndirisinde aıaq kıim óndirisi kóleminiń tómendeýi esebinen quldyraý baıqalady», - delingen Indýstrııa jáne ınfraqurylymdyq damý mınıstrligi málimetinde.
Jalpy, qazaqstandyq óndirýshiler burynǵysynsha qorǵanys salasyndaǵy tapsyrys pen arnaıy kıimder naryǵy aıasynda ónim ótkizýge tyrysady. Sebebi olar óndirýshilerge taýarlaryn kepildi satýdy qamtamasyz etedi.
«Qarapaıym zattar ekonomıkasyn» damytý máseleleri boıynsha Elbasynyń 2018 jylǵy 5 qazandaǵy Joldaýyn iske asyrý aýqymynda 2019-2021 jyldarǵa arnalǵan jeńil ónerkásipti damytý jónindegi jol kartasy ázirlendi.
Tutastaı alǵanda, jol kartasymen júıelik problemalardy sheshýdi qamtıtyn jáne óndiris kóleminiń ósýine baǵyttalǵan 50-den astam is-sharany iske asyrý kózdelgen. Sonymen qatar, atalǵan salalarda ozyq tehnologııalardy qoldana otyryp, jobalardy iske asyrýǵa ınvestıtsııalar tartý boıynsha qadamdar josparlanǵan. 2019 jyly jalpy ınvestıtsııa somasy 5 mlrd teńgege 4 jańa jobany iske qosý qarastyrylǵan.
