Elimizde jemqorlyqqa qarsy úzdik materıal jazǵan jýrnalıster arasynda baıqaý jarııalandy
ASTANA. QazAqparat - Elimizde jemqorlyqqa qarsy úzdik materıal jazǵan jýrnalıster arasynda baıqaý jarııalandy. Bul týraly búgin QR Prezıdenti janyndaǵy Ortalyq kommýnıkatsııalar qyzmetindegi brıfıngte QR Memlekettik qyzmet isteri jáne sybaılas jemqorlyqqa qarsy is-qımyl agenttigi Memlekettik qyzmet isteri jáne jemqorlyqtyń aldyn alý departamentiniń basshysy Álı Kómekbaev málim etti.
«Osy aıdyń basynda agenttik úzdik jýrnalıstik jumysqa baıqaý jarııalady. Ol «Úzdik televızııalyq jumys», «Úzdik baspa jarııalanymy», «Úzdik ınternet jarııalanymy» atalymdary boıynsha ótedi. Baıqaý qorytyndysyn kelesi aıdyń sońynda shyǵarýdy josparlap otyrmyz», - dedi ol.
A.Kómekbaevtyń sózine qaraǵanda, baıqaýǵa materıaldar osy aıdyń sońyna deıin qabyldanatyn bolady. Oǵan 2015 jylǵy 1 qańtardan 30 qarashaǵa deıin BAQ-tarda jarııalanǵan maqalalar, teledıdardan shyǵarylǵan beınematerıaldar men arnaıy baǵdarlamalar tsıklderi jiberiledi.
Atalǵan is-sharanyń negizgi maqsaty - buqaralyq aqparat quraldarynyń úzdik jarııalymdary arqyly qoǵamdyq sanaǵa áser etip, jurtshylyqtyń sybaılas jemqorlyqqa qarsy mádenıetin joǵarlatý jáne quqyq buzýshylyqtarǵa múldem tózbeýshilik ahýalyn qalyptastyrý. Baıqaýǵa respýblıkalyq jáne oblystyq BAQ-tar, ınternet-portaldardyń redaktsııalary, sondaı-aq jekelegen avtorlar, jýrnalıstter qatysa alady.
