Elimizde jeke sot oryndaýshylarynyń sany artyp keledi - Marat Beketaev
ORAL. QazAqparat - Elbasynyń «Qazaqstannyń úshinshi jańǵyrýy: jahandyq básekege qabilettilik» atty Joldaýyna sáıkes ekonomıkany jappaı tsıfrlandyrý men kóptegen rásimderdi jeńildetýge erekshe nazar aýdarylýda. Bul týraly BQO aktıvinde Elbasynyń Úndeýi men Joldaýyn túsindirý maqsatynda óńirge kelgen arnaıy toptyń jetekshisi, QR ádilet mınıstri Marat Beketaev málim etti, dep habarlaıdy «QazAqparat» HAA tilshisi.
Jıynda baıandama jasap, Úndeý men Joldaýǵa baılanysty alda turǵan maqsat-mindetterge jan-jaqty toqtalǵan mınıstrdiń aıtýynsha, «100 naqty qadam» Ult josparynyń 27-inshi qadamynda jeke sot oryndaýshylardyń ınstıtýtyn odan ári damytý, sot oryndaýshylarynyń memlekettik qyzmetin birtindep qysqartý kózdelgen. Sot sheshimderin oryndaý salasyndaǵy memleket saıasatyn qalyptastyrý - Ádilet mınıstrligi qyzmetiniń negizgi baǵyttarynyń biri. Sondyqtan jańǵyrýdyń úshinshi kezeńinde mınıstrlik atqaratyn mindet júgi de úlken. Qazirgi tańda jeke sot oryndaýshylary ınstıtýtyn damytý maqsatynda sot prıstavtaryn qysqartý júzege asyrylýda. Bul ınstıtýt engizilgennen beri 4203 lıtsenzııa berilgen. Eger 2015 jyly 996 jeke sot oryndaýshysy jumys jasasa, 2016 jyldyń qorytyndysy boıynsha olardyń jalpy sany 40 paıyz derlik kóbeıip, 1347-ge jetken. Al kómekshiler men is qaǵazdaryn júrgizýshilerdi qosa eseptegende, bul salada 4 myńdaı maman bar.
«Kúni búgin sot oryndaýshylary 26 memlekettik organdardyń 52 derekter bazasynan naqty aqparattardy alyp otyrady. Qujattardy elektrondy túrde alý jáne sot oryndaýshylary qaýlylaryn sanktsııalaý boıynsha Joǵarǵy sot jáne QR Іshki ister mınıstrliginiń aqparattyq júıelerimen qarym-qatynas ornatylǵan. Bul dálme-dál esepti tez júrgizip, atqarýshylyq qujattarynyń joǵalýyn barynsha boldyrmaýǵa múmkindik beredi. Bereshegi barlardyń múlkine tyıym salý men odan shyǵarýdyń da elektrondy tetikteri jasalyp, qoldanylýda. Batys Qazaqstan oblysynda 48 jeke sot oryndaýshysy bolsa, sonyń 29-y Oral qalasynda, 19-y oblys aýdandarynda. Barlyq aýdandar jeke sot oryndaýshylary qyzmetimen qamtylǵan. Bul sharalardyń bári ár azamattyń ómir súrý deńgeıin kóterip, olardyń konstıtýtsııalyq quqyǵy men zańdy múddesin qorǵaýǵa baǵyttalǵan», dedi M.Beketaev.
Jıynda sondaı-aq Ádilet mınıstrligi memlekettiń múliktik quqyǵyn qorǵaý jónindegi departamenti dırektorynyń orynbasary Marat Elemesov, Zelenov aýdanyndaǵy «Shońaıbekov» sharýa qojalyǵynyń jetekshisi Sergeı Shońaıbekov, oblystyq bilim salasyndaǵy baqylaý departamentiniń basshysy Svetlana Bahısheva Joldaýǵa baılanysty óz oı-tolǵamdary men usynys-tilekterin jetkizdi.
Kezdesýdi qorytyndylaǵan oblys ákimi Altaı Kólginov Elbasy Joldaýyn júzege asyrýǵa barsha azamattar belsendi qatyssa, elimizdiń damýdyń jańa kezeńine ótetinine senim bildirdi.
