Elimizde jeke sot oryndaýshylary ınstıtýty engiziletin boldy
ASTANA. Sáýirdiń 5-i. QazAqparat /Aıdar Ospanalıev/ - Elimizde jeke sot oryndaýshylary ınstıtýty engiziletin boldy. Bul týraly búgin buqaralyq aqparat quraldarynyń ókilderimen arnaıy ótken baspasóz máslıhatynda Joǵarǵy sot janyndaǵy Sot ákimshiligi komıteti tóraǵasynyń birinshi orynbasary Baqtııar Ónerbaev málim etti,
dep habarlaıdy QazAqparat.
Esterińizge sala keteıik, elimizde jeke sot oryndaýshylar ınstıtýtyn engizýdi Elbasy Nursultan Nazarbaev 2005 jyly ótken respýblıka sýdıalarynyń IV sezinde kótergen bolatyn. «Sodan bergi 4 jyl ishinde Sot ákimshiligi komıeti atalmysh ınstıtýtty engizý múmkindikterin qarastyrýda qyrýar sharalar atqardy. Aıtalyq, atalmysh másele kóptegen halyqaralyq jáne respýblıkalyq jıyndarda talqylanyp, arnaıy vedomstvoaralyq komıssııa otyrystarynda qaraldy. Oǵan baılanysty tipti aqparat quraldarynda da tıisti talqylaýlar uıymdastyryldy. Al sáýirdiń 2-si kúni Memleket basshysy Nursultan Nazarbaev «Qazaqstan Respýblıkasynyń keıbir zańnamalyq aktilerine atqarýshylyq is júrgizý máseleleri boıynsha ózgerister men tolyqtyrýlar engizý týraly» jáne «Atqarýshylyq is júrgizý jáne sot oryndaýshylarynyń mártebesi týraly» zańǵa qol qoıdy», dedi komıtet basshysynyń orynbasary.
Onyń sózine qaraǵanda, jańa qabyldanǵan qujattarda jeke sot oryndaýshylarynyń quzyryn keńeıtetin kóptegen baptar bar. Mysaly, onda sot oryndaýshylaryna boryshkerlerdiń elimizdiń aımaǵynan shyǵýyna tyıym salýlaryna múmkindik beretin baptar engizilgen. Sonymen qatar sot oryndaýshalyrynyń keıbir boryshkerlerdi shaqyrý men habarlaý máselesi boıynsha da quzireti keńeıtilip otyr. «Qoryta aıtqanda, jańa zań talaptary boıynsha, sot oryndaýshylarynyń quziretin retteýge qatysty baptar 88-den 177-ge deıin artty. Bul olarǵa barynsha tıimdi ári talapqa saı jumys isteýlerine jaqsy múmkindik jasaıdy. Sonymen qatar atalmysh shara jeke sot oryndaýshylary men memlekettik sot oryndaýshylarynyń arasynda báseke týdyrady», dedi B.Ónerbaev.
