Elimizde jeke basyn kýálandyratyn qujattary joq 3,5 myńnan asa adam anyqtaldy
NUR-SULTAN. QazAqparat – Elimizde jeke basyn kýálandyratyn qujattary joq 3,5 myńnan asa adam anyqtaldy. Bul jaıynda Májilis depýtattarynyń saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«2020 jylǵy qyrkúıek aıynan bastap Іshki ister mınıstrligi úkimettik emes uıymdarmen (Adam quqyqtaryn jáne zańdylyqty saqtaý jónindegi halyqaralyq bıýro jáne «Sana Sezim» áıelder bastamalarynyń quqyqtyq ortalyǵy» AQ, «Otandastar» qory) birlesip, mártebesi rettelmegen, jeke basyn kýálandyratyn qujattary joq adamdardy anyqtaý boıynsha respýblıkalyq naýqan ótkizýde. ІІM-niń aqparaty boıynsha osy sanattaǵy 3,5 myńnan asa adam, olardyń kópshiligi Qaraǵandy (353), Túrkistan (284), Aqmola (279), Jambyl (276) oblystarynan jáne Almaty qalasynda (299) anyqtaldy», - dedi Asqar Mamın.
Úkimet basshysynyń atap ótýinshe, 300-den astam adam Qazaqstan Respýblıkasynyń azamaty bolyp tanyldy jáne olarǵa tıisti qujattar resimdeldi. Shamamen 2 myń adamǵa qatysty azamattyǵyn rastaý rásimi aıaqtalýda, 353 – azamattyǵy joq adam retinde tanyldy. Basqasyna (819) qatysty tekseris is-sharalary jalǵasýda.
«Osy naýqan aıasynda qujattandyrýda problemalyq máselelerge tap bolǵan 155 etnıkalyq qazaq, onyń ishinde 18 bala anyqtaldy. Olarǵa belgilengen tártippen kómek kórsetilýde. Respýblıkalyq naýqan osy jyldyń mamyryna deıin jalǵasady», - dedi Premer-Mınıstr.
