Elimizde jedel járdemniń naýqastarǵa jetý ýaqyty qysqardy
«Halyqtyń maǵan kóbine shaǵymdanatyn negizgi úsh problemasy bar ol - emhanalardaǵy kezek, naýqastardy qabyldaıtyn bólmelerdiń jumys formaty jáne jedel járdem brıgadasynyń jetý ýaqyty. Bul mehanızmder bir-birimen ózara baılanysty. Búgin óńirlermen 103 qyzmetin jetildirý jumystarynyń ótken jyl boıynsha qorytyndy jıynyn ótkizdik. Jumys nátıjeleriniń biri retinde emhanalardyń sozylmaly aýrýy bar emdelýshilermen jumystyń jaqsarýy. Oǵan dálel sozylmaly aýrýdyń asqynýy boıynsha jedel járdem kómegine júginý dınamıkasynyń azaıýy. 2018 jyldyń sońynda atalǵan másele boıynsha jedel járdemdi shaqyrtý 584 743-ke deıin qysqarǵan», - deıdi QR Densaýlyq saqtaý mınıstri Eljan Birtanov óziniń Feısbýk paraqshasynda.
Mınıstrdiń aıtýynsha, statsıonarlyq qabyldaý bóliminde pılottyq joba aıasynda jumys jasaýdyń jańa formaty engizilgen. Atap aıtqanda, mamandardy halyqaralyq standart boıynsha oqytý, redızaın jáne qaıta jóndeý jumystary, sol sııaqty materıaldyq-tehnıkalyq jabdyqtaý bazasynyń jetildirilýi.
«2018 jyly jedel medıtsınalyq kómek kórsetýdiń eki deńgeıli modelin engizýdiń nátıjesinde jedel járdemniń patsıentke barý ýaqyty aıtarlyqtaı qysqardy. Salystyrmaly túrde aıtsaq, 2017 jylmen 2018 jyldyń shilde aıy aralyǵynda jetý ýaqyty 25 mınýttan 18 mınýtqa deıin qysqardy. Al 2018 jyldyń sońynda jyldamdyq ortasha eseppen 15 mınýt 42 sekýndty qurady. Tıisinshe 103-ke qońyraý shalýshylardyń sanymen qatar, keshigip qyzmet kórsetýde azaıdy», - dedi mınıstr.
Sonymen qatar, E.Birtanov jedel járdem qyzmetin jetildirý standarttarynyń biri retinde «qońyraýdy ustap turý» prıntsıpi boıynsha jumys jasaýdyń engiziletinin aıtty. Ol degenimiz qaýyrt jaǵdaıda jedel járdem jetem degenshe 103 stantsııasynyń dıspetcheri zardap shegýshige halyqaralyq standartqa sáıkes alǵashqy kómek nusqaýlyǵyn beredi.