Elimizde jazasyn ótegen qylmystyq álemniń serkesi «Landııa» respýblıka aýmaǵynan shyǵaryldy
ASTANA. Mamyrdyń 19-y. QazAqparat /Aıdar Ospanalıev/ - Іshki ister salasynyń qyzmetkerleri Ulttyq qaýipsizdik komıteti ókilderimen birlesip júrgizilgen operatsııanyń barysynda uıymdasqan qylmystyq toptardyń 5 basshysy men 25 belsendi múshesine jáne qylmystyq álemniń 8 bedeldisine qatysty qylmystyq is qozǵady.
Bul týraly búgin jýrnalıstermen bolǵan baspasóz-máslıhatynda Іshki ister mınıstrliginiń Krımınaldyq polıtsııa komıtetiniń tóraǵasy Sultan Kúsetov málim etti, dep habarlaıdy QazAqparat.
Onyń aıtýynsha, tártip saqshylary eldegi qylmystyq ahýaldy ońaltýǵa baǵyttalǵan jáne Ulttyq qaýipsizdik komıtetiniń ókilderimen birlesip júrgizilgen jedel-saýyqtyrý sharasyn mamyrdyń 11-i men 17-si aralyǵynda júrgizgen. «Mamyrdyń 15-i kúni Astanada oıyn-saýyq oryndaryna «qamqorlyq» jasap, ortalyq aımaqta esirtki saýdasyn baqylaýmen aınalysyp júrgen qylmystyq toptyń basshysyn ustady. Sondaı-aq Batys Qazaqstan oblysynda orta jáne joǵary bilim berý oryndarynda aqsha jınaýdy uıymdastyryp júrgen azamatty qolǵa túsirdi. Sonymen qatar uıymdasqan qylmyspen baılanysty zańsyz áreketterge barǵan 28 azamat qolǵa tústi. Al mamyrdyń 13-i kúni «Landııa» degen esimmen belgili «Vor v zakone» ataǵy bar qylmysker elimizde qylmystyq jazasyn ótegen soń el aýmaǵynan shyǵaryldy», dedi komıtet tóraǵasy.
Sondaı-aq onyń aıtýynsha, atalmysh operatsııa barysynda uıymdasqan qylmyspen baılanysty 97 qylmystyq is qozǵalyp, olardyń 3-ýi osyndaı toptardy uıymdastyrýmen jáne basqarýmen baılanysty boldy.
