Elimizde «Jasyl tehnologııalar» Halyqaralyq ortalyǵyn qurylmaq
ASTANA. QazAqparat - Astana qalasynda «EKSPO-2017» halyqaralyq mamandandyrylǵan kórmesi aıasynda «Jasyl kópir» seriktestik baǵdarlamasy» Halyqaralyq forýmy ótti.
Forýmǵa álemniń 10 memleketinen 200-den astam delegat qatysyp, «jasyl ekonomıka» salasyndaǵy máselelerdi, «jasyl» tehnologııalardy engizý boıynsha halyqaralyq tájirıbe almasý, bıznestiń «jasyl» damýy men «jasyl» bıznestiń qaǵıdattaryn ustaný sekildi suraqtardy talqylaý múmkindigine ıe boldy.
Memlekettik saıasat salasyndaǵy túrlendirýdiń joǵary ekpini kelesi mindetterdi qamtıtyn «Qazaqstan 2050» strategııasynda anyqtalǵan:
- elektr energetıkasy salasynda balamaly jáne jańartylatyn elektr energııa úlesi 2030 jylǵa qaraı 10%-ǵa jetýi tıis;
- energııa tıimdiligin arttyrý salasynda JІÓ elektr syıymdylyǵyn 2020 jylǵa qaraı 25%-ǵa tómendetý mindeti qoıylǵan;
- sý qorlary salasynda 2020 jylǵa qaraı halyqty aýyz sýmen qamtamasyz etý jáne 2040 jylǵa qaraı aýyl sharýashylyǵyn sýmen jabdyqtaý máseleleri tur;
- aýyl sharýashylyǵy salasy aýyl sharýashylyq alqaptarynyń ónimdiligin 2020 jylǵa qaraı 1,5 ese arttyrý jolynda qyzmet etýi tıis;
- qaldyqtardy joıý salasynda qaıta óńdelgen qaldyqtardyń úlesin 2030 jylǵa qaraı 40%-ǵa deıin jetkizý kózdelgen.
Sonymen qatar Forým sheńberinde tómen kómirtekti tehnologııalar men klımat jónindegi Parıj kelisimin júzege asyrý jáne «jasyl» qarjyny jumyldyrý saıasatynyń suraqtary talqylandy.
Forým jumysyna ár salanyń bedeldi sarapshylary men ataqty ǵalymdar qatysty. Solardyń ishinde praktıkalyq ádister boıynsha dıalogtardy ázirleýmen jáne belsendi pozıtsııasymen tanymal, 2007 jylǵy álemdik Nobel syılyǵynyń laýreaty, klımattyń ózgerýi boıynsha BUU Bas hatshysynyń keńesshisi, ońtústik Koreıa eliniń týmasy Rae Kvon Chýng myrzany atap ótýge bolady. 2017 jylǵy maýsym aıynda bul ǵalym energııany tıimdi únemdeýge jáne jyldyń sýyq mezgilinde jylýdy saqtaıtyn qala ǵımarattaryn salýmen erekshelengen kanadalyq Monreal qalasynyń tájirıbesin qarastyrýǵa keńes bergen bolatyn.
Buǵan qosa Forým sheńberinde Qazaqstandaǵy alǵashqy «jasyl» aýylǵa, ıaǵnı «Arnasaı» jasyl tehnologııalar ortalyǵyna barý josparlanǵan. Shamamen Astanadan 30 shaqyrym jerde ornalasqan «Arnasaı» aýyly jasyl tehnologııalardy engizý arqyly elimizde energotıimdilikti nasıhattap keledi. Munda jastardyń «EXPO-CAMP» lageri, ekoqonaqúıler, jasyl tehnologııalar ortalyǵy, «G-Global» saıabaǵy bar.
Aıta ketý kerek, jasyl aýylda ınnovatorlar men elimizdiń jastarynyń qatysýymen «jasyl» tehnologııalar kórmesi ótedi.
QR Energetıka mınıstriniń sózderine súıensek, «Arnasaı» «Jasyl kópir» seriktestik baǵdarlamasynyń úzdik jobasy ǵana emes, elimizdegi «jasyl» bilimdi dáripteýdi negizgi mindeti dep retinde qabyldaǵan alǵashqy ortalyqqa jatady, ıaǵnı ortalyqtyń basty maqsaty - turǵyndarǵa jasyl ekonomıka men tehnologııalar týraly júıeli bilim berý. Jańadan ashylǵan ortalyq 1 myń sharshy metr aýmaqty alyp jatyr. Munda 15 ınnovatsııalyq tehnologııa qamtylǵan. Al qazirgi tańda «Arnasaı» aýylynda 35 aýqymdy joba júzege asyrylýda.
«Jasyl kópir» bastamasyn ary qaraı damytýdyń mańyzdy qadamyna 2018 jyldan bastap, «EKSPO» pavılondarynyń bazasynda «Jasyl tehnologııalar» Halyqaralyq ortalyǵyn qurýdy jatqyzýǵa bolady.
Búgingi tańda «Jasyl kópir» seriktestik baǵdarlamasy 15 memleketti jáne 16 úkimettik emes uıymdardy biriktirdi.
