Elimizde jasóspirimder syranyń táýeldilik qarmaǵyna túsýde - Sáýle Dıqanbaeva
ALMATY. Qazannyń 28-i. QazAqparat /Názıra Eleýhan/ - Qazaqstanda alkogol problemasy áli de ózekti bolyp otyr.
Elimizde jas býyn arasynda syrany tutyný kóbeıip, olar táýeldilik qarmaǵyna túsýde.
Bul týraly búgin «Qazaqstanda alkogoldi tutynýdy tómendetý: aqıqaty men bolashaǵy» atty "Alkogoldi tutynýdan bas tartý» kúnine arnalǵan baspasóz májilisinde Salaýatty ómir saltyn qalyptastyrý problemalary ulttyq ortalyǵynyń bas dırektory Sáýle Dıqanbaeva málim etti, dep habarlaıdy QazAqparat.
Onyń aıtýynsha, Qazaqstanda sońǵy kezderi balalardyń - 9,4, al jasóspirimderdiń - 21,3, jastardyń 46 paıyzy alkogoldi ishimdikterdi tutynady. Onyń ishinde, ásirese stýdenttik ortada, syra sándi ishimdikke aınalyp otyr. 2007 jylǵy ortalyqtyń zertteýleri boıynsha Qazaqstan halqynyń 35,6 paıyzy alkogoldi ishimdikterge beıim.
Búgin «Alkogoldi tutynýdan bas tartý kúnine» oraı barlyq elderde jastar arasynda, «Biz birigip temekini, alkogoldi jáne esirtkilerdi jeńemiz» atty aktsııalar, baspasóz máslıhattary, synyp saǵattary, dóńgelek ústelder, semınarlar men trenıngter jáne taǵy da basqa sharalar ótkizilýde.
