Elimizde jasóspirim psıhıkasyna keri áser etetin 731 materıal boıynsha is-shara qabyldandy
«Aqparat salasyndaǵy ýákiletti organ turaqty negizde sýıtsıdtik minez-qulyqty tikeleı nemese janama nasıhattaıtyn zańsyz kontentterdi anyqtaý jáne buǵattaý boıynsha buqaralyq aqparattyq quraldaryna, áleýmettik jelilerge, ınternet resýrstarǵa monıtorıng júrgizedi. 2020 jyly monıtorıng nátıjesinde anyqtalǵan jasóspirimder psıhıkasyna keri áser etetin 30 myńǵa jýyq materıal ınternet resýrstardan alyp tastaldy. 3 772 astam materıalǵa tosqaýyl qoıyldy. 2021 jyldyń basynan bastap sýıtsıdti, pornografııany nasıhattaıtyn, qatygezdikke tabynýdy qalyptastyratyn 731 materıal boıynsha is-sharalar qabyldandy», - dedi Úkimet basshysy.
Premer-Mınıstrdiń atap ótýinshe, barlyq mektep oqýshylarynyń boıyna ulttyq tárbıeni sińirýge, otbasylyq qundylyqtardy damytýǵa baǵyttalǵan «Qundylyqtarǵa negizdelgen bilim berý» jobasy iske asyrylyp jatyr. Bul joba ózin-ózi tanýdy, ózin-ózi damytýdy, áleýmettik jaýapkershilikti jáne oqýshylardyń áleýmettenýin qalyptastyrýǵa yqpal etedi.
«Tárbıe jumysyn kúsheıtý, oqý-tárbıe protsesinde otbasylyq jáne ulttyq qundylyqtardy dáripteý jónindegi is-sharalar kesheni iske asyrylýda. Pedagogterdiń oqýshylarǵa tárbıe berý boıynsha quzyrettiligi keńeıtildi. Osyǵan baılanysty olardyń biliktiligin arttyrý baǵdarlamalarynyń mazmuny jańartyldy. Bilim berý júıesiniń ádistemelik mazmuny qaıta qaraldy», - dedi Asqar Mamın.
