Elimizde jasandy ventılıatsııa apparaty jetkilikti me

NUR-SULTAN. QazAqparat – Boljam boıynsha, elimizde 3500 koronavırýs dertin juqtyrǵan naýqas bolsa, onyń 5%-ynyń ǵana jaǵdaıy kúrdeli bolýy múmkin. Bul týraly eldegi koronavırýs ınfektsııasy jaǵdaıy jaıly onlaın brıfıngte aıtyldy, dep habarlaıdy QazAqparat tilshisi.

«Biz monıtorıng jasap otyrmyz. Qazirgi kúnde 3000-ǵa jýyq apparat bar. Ol jedel járdem kólikterinde, aýdandyq aýrýhanalarda jáne úlken medıtsınalyq uıymdarda jetkilikti deńgeıde bar. Bul - tez tozatyn jabdyq, sol sebepti el boıynsha qajettilik bar. Jyldyń basynda el boıynsha 927 apparat bolǵan, biraq qazirgi jaǵdaıda ınfektsııalyq aýrýhanalarǵa 167 apparat qoıylǵan. Qazir basqa aýrýhanalardan 70 apparat jetkizýge daıyn otyrmyz» , - deıdi QR Densaýlyq saqtaý mınıstri Eljan Birtanov.

Ol bul apparatty satyp alý qajet ekenin aıtty.

«Dúnıe júzinde osyndaı másele kóterildi. Ótken aptada QR Densaýlyq saqtaý mınıstrligi 270 apparat satyp alý boıynsha tender ótkizip, kelisimshartqa qol qoıdy. Ol apparat sáýir aıynda keledi. Sonymen barlyq ınfektsııalyq jáne basqa da aýrýhanalarda bul apparat jetkilikti bolady. Osyǵan qosymsha otandyq mobıldik 180 apparat keledi. Demeýshiler kómektesip, bizge berip jatyr. Qazirgi ýaqytta keıbir otandyq óndirýshiler tórtenshe jaǵdaıǵa baılanysty bizge kómek kórsetip, óndirisin tezdetip kóbeıtip jatyr. Boljam boıynsha, 3500 koronavırýs dertin juqtyrǵan naýqas bolsa, onyń 5%-ynyń ǵana jaǵdaıy kúrdeli bolýy múmkin. Osy naýqastarǵa qajetti apparat sany jetkilikti», - deıdi ol.