Elimizde jarty jylda 16,6 myńnan astam turǵyn úı paıdalanýǵa berildi

ASTANA. QazAqparat – Bıylǵy alty aıda Qazaqstanda aýmaǵy 7,1 mln m2 astam turǵyn úı paıdalanýǵa berildi. Bul 2022 jyldyń osy kezeńimen salystyrǵanda 11,3% artyq, dep habarlaıdy QazAqparat.

Ulttyq statıstıka bıýrosynyń málimetinshe, ótken alty aı men bıylǵy jarty jyldy salystyratyn bolsaq, óńirler arasynda jańadan paıdalanýǵa berilgen turǵyn úılerdiń aýdany boıynsha Abaı oblysy kósh bastap tur: ósim – 56,3%. Odan keıingi orynda 43,4% ósimmen Shymkent qalasy, 39% – Jetisý oblysy.

2023 jyldyń qańtar-maýsym aılary aralyǵynda elimiz boıynsha 16 677 turǵyn úı nysany iske qosyldy. Onyń ishinde 16 083 – jeke úı, 574 – kóppáterli úı, qalǵan 20 – jataqhana.

Kópqabatty úılerde 63,1 myń páter paıdalanýǵa berildi. Bul ótken jylmen salystyrǵanda 15,1% artyq. Kópqabatty úılerdiń 7,6%-yn memlekettik qurylys kompanııalary, 91,2%-yn jeke kompanııalar, 1,2%-yn sheteldik kompanııalar salǵan.

Sonymen qatar aýyldyq jerlerde de turǵyn úılerdi paıdalanýǵa berý boıynsha ósim baıqaldy. Máselen, 2023 jyldyń qańtar-maýsym aılarynda aýyldarda 1,6 mln m2 astam turǵyn úı berildi. Bul 2022 jyldyń sáıkes kezeńimen salystyrǵanda 10,7% artyq.