Elimizde janýarlarǵa ekpe salý kórsetkishi qaı deńgeıde
NUR-SULTAN. QazAqparat – QR AShM Veterınarııalyq baqylaý jáne qadaǵalaý komıteti tóraǵasynyń mindetin atqarýshy Baýyrjan Abyzbaev janýarlardy vaktsınalaý kórsetkishi jaıynda baıandady, dep habarlaıdy QazAqparat tilshisi.
«Respýblıkamyzdyń aýmaǵynda taralý qaýpi joǵary janýarlardyń asa qaýipti aýrýlarynyń tizbesine aýrýlardyń 68 túri engizilgen, olardyń 45 túri boıynsha Qazaqstan qolaıly epızootııalyq jaǵdaıǵa ıe, al 23 túri boıynsha dıagnostıka jáne vaktsınatsııa boıynsha arnaıy veterınarııalyq-profılaktıkalyq is-sharalar júrgizilip keledi. Respýblıka aýmaǵynda janýarlardyń asa qaýipti aýrýlaryna qarsy profılaktıkalyq maqsatta vaktsınatsııa júrgiziledi», - dedi B. Abyzbaev Ortalyq kommýnıkatsııalar qyzmetinde.
Onyń aıtýynsha, janýarlardyń asa qaýipti aýrýlarynyń veterınarııalyq-profılaktıkalyq is-sharalar josparyna sáıkes, 2021 jylǵa 154 mln-nan astam janýardy, sonyń ishinde qustardy 22 aýrýǵa vaktsınalaý boıynsha manıpýlıatsııalar josparlanǵan. Vaktsınatsııalyq is-sharalardy júrgizý maqsatynda 7,2 mlrd teńge bólindi.
«Búgingi kúni 138 mln vaktsınatsııalyq is-sharalar júrgizildi nemese 2021 jyldaǵy jalpy jospardyń 90% kórsetkishin qurady. Ýákiletti organ bekitken tizbege engizilgen janýarlardyń asa qaýipti aýrýlarynyń dıagnostıkasy respýblıkalyq bıýdjetten qarjylandyrylady. Janýarlardyń asa qaýipti aýrýlaryna qarsy dıagnostıkalyq zertteýler júrgizýdi «Respýblıkalyq veterınarııalyq zerthana» RMK júzege asyrady. 2021 jyly janýarlardyń asa qaýipti 27 aýrýy boıynsha 70,3 mln dıagnostıkalyq zertteý júrgizý josparlanǵan. 2021 jylǵa arnalǵan janýarlardyń asa qaýipti aýrýlaryn dıagnostıkalaý boıynsha veterınarııalyq is-sharalar josparyna sáıkes, respýblıka boıynsha 9 aıda 52,5 mln dıagnostıkalyq zertteý júrgizildi nemese jyldyq jospardyń 75 paıyzy», - dedi B. Abyzbaev.
