Elimizde jańartylatyn energııa kózderin damytý úshin memlekettik qoldaý sharalary ázirlenedi
NUR-SULTAN. QazAqparat - Jańartylatyn energetıka kózderi - ınvestıtsııalyq tartymdylyǵy joǵary salalardyń biri bolyp otyr. Bul týraly búgin Úkimet otyrysynda QR Premer-Mınıstri Asqar Mamın aıtty, dep habarlaıdy QazAqparat tilshisi.
«Búgingi tańda álemdik tájirıbege sáıkes, balamaly energııa kózderin damytý - bul ınvestıtsııalardy tartý jáne ekologııany jaqsartý boıynsha mańyzdy trend sanalady. Sońǵy 10 jylda jańartylatyn energııa kózderiniń álemdik qýaty 4 ese 414-ten 1 650 GVt-ǵa deıin ulǵaıdy. Al osy kezeńdegi jahandyq ınvestıtsııalar 2,6 trln dollarǵa jetetin bolady. Qazaqstanda osy jyldyń sońyna qaraı qýaty 1 042 Mvt bolatyn jańartylatyn energııa kózderiniń 82 nysany jumys isteıdi. Investıtsııa kólemi 406 mlrd teńgeni qurady. Biz álemdik qaýymdastyqpen birge qadam jasaýymyz kerek», - dedi Úkimet basshysy.
Onyń atap ótýinshe, jańartylatyn energetıka kózderi – ınvestıtsııalyq tartymdylyǵy joǵary salalardyń biri bolyp sanalady. Osyǵan oraı elimiz belgilegen qýaty shamamen 3000 MVt bolatyn jańartylatyn energııa kózderi jobalaryn satý úshin halyqaralyq aýktsıondyq saýda-sattyq ótkizgen. Oǵan álemniń 12 elinen 138 kompanııa qatysty.
«Energetıka, Qarjy, Ulttyq ekonomıka mınıstrlikteri men «KEGOC» kompanııasy nazar aýdarýy tıis birqatar máseleni atap ótkim keledi. Qazirgi tańda jel jáne kún elektr energııasynyń baǵasy tómendeýde. Jańartylatyn energııa kózderiniń damýyn yntalandyrý jáne olardyń tıimdi qoldanylýyn qamtamasyz etý maqsatynda memlekettik qoldaý sharalaryn ázirleýdi tapsyramyn. Jalpy jańartylatyn energııa kózderi jobalaryn iske asyrý kezinde ınvestıtsııa tartymdylyǵyn arttyrý úshin Energetıka mınıstrligine halyqaralyq tájirıbeni eskere otyryp, qoldanystaǵy zańnamaǵa tıisti túzetýler engizýdi tapsyramyn», - dedi Premer-Mınıstr.
