Elimizde jańa munaı óndirý jobalary iske qosylady
«Búginde munaı-gaz salasy naryǵynda qarbalas. Oǵan birneshe sebep bar, birinshiden, munaı baǵasynyń ósýi osy salaǵa jańa bir serpilis berdi. Ekinshiden, munaı óndirý operatorlary jańa jobalardy qolǵa aldy. Naqtyraq toqtala ketetin bolsaq, bıýdjeti 5 mlrd AQSh dollaryn quraıtyn Qarashyǵanaq óndirisin keńeıtý jumystary qolǵa alyndy. Sol sııaqty Kaspıı teńizinde Hazar jáne Qalamqas munaı óńdeý jobalarynyń kontseptsııasy daıyn, jýyrda iske qosylady. Budan bólek Teńiz ken qoınaýynda bıýdjeti 5 mlrd AQSh dollaryn quraıtyn jańa joba iske aspaq», - dedi Qazaqstan munaı servıs kompanııalar odaǵynyń tóralqa tóraǵasy Rashıd Jaqsylyqov.
Sonymen qatar odaq tóraǵasy Elbasy Joldaýyndaǵy atalǵan sala boıynsha atqarylýy tıis tapsyrmalarǵa da toqtaldy.
«Munaıgaz salasynda nesıe sektoryn jańǵyrtý úshin Elbasy atap ótkendeı tikeleı ınvestıtsııalar qoryn qurýdy qolǵa aldyq. Búginde otandyq kompanııalar úshin banktik nesıelerdiń kólemin arttyrý talaby qoıyldy. Óıtkeni keıbir tenderlerdiń baǵasy qyrýar qarjyny qajet etedi, al erkin aınalymda qarajaty bar otandyq kompanııalar az. Osy turǵyda Elbasy tapsyrmasy ekonomıkanyń atalǵan sektoryn jańǵyrtýǵa yqpalyn tıgizedi», - dedi ol.
Aıta ketsek, Elbasy Qazaqstan halqyna Joldaýynda sońǵy 20 jylda elimizdiń 300 mlrd. AQSh dollary kólemindegi tikeleı sheteldik ınvestıtsııa tartylǵandyǵyn aıtqan bolatyn.
Statıstıkaǵa súıensek, elimizdegi barlyq munaı servıs salasy qyzmetteriniń tek 50% qazaqstandyq kompanııalarǵa tıesili, al jer qoınaýyn paıdalaný salasyndaǵy munaı servıs qyzmetiniń jyldyq aınalymy 8 mlrd AQSh dollaryn qurap otyr.
Eske sala ketsek, Qazaqstannyń munaı servıstik kompanııalar odaǵy 2011 jyldyń qazan aıynda qurylǵan. Odaqtyń quramynda barlyǵy 160 munaı kompanııasy bar. Odaqtyń maqsaty - Qazaqstannyń iri munaı gaz jobalarynda jergilikti úlesti arttyrý, qazaqstandyq kompanııalardyń mundaı jobalarǵa kóbirek qatysýyn qamtamasyz etý.
