Elimizde jańa ǵylymı mektepter qalyptasady – BǴM

NUR-SULTAN. QazAqparat – Búgingi tańda ǵylymı jumystardyń 56%-yn joǵary oqý oryndary júzege asyrýda. Bul týraly QR BǴM alqa otyrysy sheńberindegi «Qazaqstan ǵylymyn damytýdyń ózekti máseleleri» sektsııasynda QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

«Olardyń basym kópshiligi QazUÝ, EUÝ, QazUTZÝ, Nazarbaev Ýnıversıtetinde, Qazaq agrotehnıkalyq ýnıversıtetinde, QazUPÝ-da shoǵyrlanǵan. Jyl sońyna deıin konkýrstyq negizde úzdik JOO irikteletin bolady. Olardyń bazasynda mınıstrliktiń qarjylyq qoldaýymen «Akademııalyq basymdyqtar ortalyǵy» qurylady», - deıdi Ashat Aımaǵambetov.

Onyń aıtýynsha, mundaı ortalyqtardyń negizgi mindeti – jańa ǵylymı mektepterdi qalyptastyrý jáne álemdegi óz zertteýlerin ilgeriletý arqyly jańageneratsııany zertteýshilerdi daıarlaý.

«Nátıjesinde mundaı joǵary oqý oryndary QS jáne Times Higher Education reıtıngterinde laıyqty oryn alýy tıis. Sondaı-aq, doktoranttarǵa oqý aıaqtalǵannan keıin mınıstrlik tarapynan tólemsiz taǵy bir jyl berý josparlanyp otyr. Onyń ishinde oqýdy jalǵastyrýǵa jáne sanktsııasyz qorǵaýǵa shyǵýǵa ruqsat etiledi», - deıdi ol.