Elimizde jalpy juqpaly aýrýlar boıynsha epıdemıologııalyq ahýal turaqty

NUR-SULTAN. QazAqparat – Elimizde koronavırýs ınfektsııasyn qospaǵanda, juqpaly aýrýlar boıynsha epıdemıologııalyq jaǵdaı turaqty. Bul týraly Úkimet otyrysynda QR Densaýlyq saqtaý mınıstri Alekseı Tsoı aıtty, dep habarlaıdy QazAqparat tilshisi.

«Koronavırýs ınfektsııasyn qospaǵanda, juqpaly aýrýlar boıynsha epıdemıologııalyq jaǵdaı jalpy Qazaqstan Respýblıkasynda turaqty bolyp qalýda. 64 ınfektsııalyq aýrý boıynsha monıtorıng júrgizilýde, 2020 jyldyń qorytyndysyna sáıkes 42 ınfektsııa boıynsha aýrý deńgeıi tómendedi», - deıdi QR Densaýlyq saqtaý mınıstri Alekseı Tsoı.

Onyń aıtýynsha, bıyl Qazaqstan turǵyndary ishinde oba, tyrysqaq, ish súzegi, qutyrma, týlıaremııa, Kongo-Qyrym gemorragııalyq qyzbasy, dıfterııa, sirespe, qyzamyq, qyzylsha, sibir jarasy jáne bezgek aýrýymen aýyratyndar tirkelgen joq.

«Ótken jyldyń osy kezeńimen salystyrǵanda 45 ınfektsııalyq aýrýmen aýyrǵandar kórsetkishiniń tómendeýi baıqaldy», - deıdi ol.