Elimizde jalpy sıpattaǵy transfertterdi esepteý ádistemesi jetildirilýde
Bul jaıynda senatorlardyń depýtattyq saýalyna QR Premer-Mınıstri Asqar Mamınniń jaýabynda aıtylǵan, dep habarlaıdy QazAqparat tilshisi.
«Jalpy sıpattaǵy transfertterdi esepteý ádistemesin 2021-2023 jyldarǵa arnalǵan Atyraý oblysynyń damý bıýdjetiniń jáne respýblıkalyq bıýdjetten beriletin transfertterdiń mólsherin ulǵaıtý bóliginde qaıta qaraýǵa qatysty sizderdiń saýaldaryńyzdy qarap, mynany habarlaımyn. 2020-2022 jyldarǵa arnalǵan alýlar kólemi Jalpy sıpattaǵy transfertterdi esepteý ádistemesi boıynsha eseptelgen. Munda kórsetiletin qyzmetterdi tutynýshylar sanyna esepteý, óńirlik erekshelikter men erekshelikti eskeretin birqatar kórsetkishti qoldaný, sondaı-aq jergilikti bıýdjettiń kiristeri men shyǵystarynyń arasyndaǵy aıyrmashylyq negizgi qaǵıdattar bolyp tabylady. Atyraý oblysy respýblıkalyq bıýdjettiń negizgi donorynyń biri ekeni ózderińizge belgili», - dedi Úkimet basshysy.
Onyń aıtýynsha, 2019 jylmen salystyrǵanda (328,5 mlrd teńge) oblys bıýdjetiniń kiristeri 2020 jyly 376,3 mlrd teńgege deıin ósti. Túsimderdiń jyl saıynǵy serpini aldyńǵy jylǵa qaraǵanda aıtarlyqtaı ósý qarqynyn kórsetýde. Mysaly 2019 jyly - 116,7 jáne 2020 jyly - 114,6 paıyz boldy.
«Alýlardyń 2020-2022 jyldarǵa ulǵaıýy kirister boıynsha boljamnyń ulǵaıýyna baılanysty. 2020-2022 jyldarǵa arnalǵan kiris kólemin boljaý kezinde shaǵyn jáne orta bıznesten túsetin korporatıvtik tabys salyǵyn (budan ári – KTS) jáne benzındi kóterme saýdada ótkizýge arnalǵan aktsızderdiń ulǵaıtylǵan mólsherlemesin qoldanýdan túsetin túsimder eskerildi. 2020 jyly Atyraý oblysynyń bıýdjetine shaǵyn jáne orta bıznesten KTS qoldaný esebinen 39,6 mlrd teńge tústi. Bul Qazaqstan Respýblıkasy Úkimetiniń boljamynan 11,2 mlrd teńgege artyq. Budan basqa 2020-2022 jyldarǵa arnalǵan jalpy sıpattaǵy transfertterdi esepteý kezinde Jalpy sıpattaǵy transfertterdi esepteý ádistemesine jergilikti kiristerdiń ósý áleýetin eskeretin damý bıýdjetiniń boljamyna yntalandyrýshy quraýyshty engizý bóliginde ózgerister engizildi», - dedi Premer-Mınıstr.
Asqar Mamınniń atap ótýinshe, osynyń negizinde 2020 jyly 37,9 mlrd teńgeden 2022 jyly 49,0 mlrd teńgege deıin birtindep ulǵaıtý maqsatynda Atyraý oblysynyń damý bıýdjeti engizilgen. Respýblıkalyq bıýdjette 2021 jylǵa Atyraý oblysynyń áleýmettik-ekonomıkalyq damýy úshin 56,9 mlrd teńge somasynda shyǵystar kózdelgen.
«Jalpy Qazaqstan Respýblıkasynyń Úkimeti bıýdjetaralyq qatynastardy jetildirý boıynsha jumystardy jalǵastyryp jatyr. Osylaısha qazirgi ýaqytta Jalpy sıpattaǵy transfertterdi esepteý ádistemesin jetildirý boıynsha jumys júrgizilýde, munda jalpy sıpattaǵy transfertterdi esepteý kezinde olardyń ózektiligi jáne halyqtyń ómir súrý deńgeıin arttyrýǵa baǵyttalǵan óńirlik erekshelik eskerile otyryp, qoldanylatyn kórsetkishter men koeffıtsıentter qaıta qaralatyn bolady», - dedi ol.
