Elimizde zańnamalyq turǵyda ýchaskelik ınspektorlardyń mártebesi ósedi– Erlan Turǵymbaev
«Biz ýchaskelik ınspektorlardyń mártebesin zańnamalyq turǵyda kóterip kelemiz. Prezıdent óz sózinde «qylmystyń aldyn alatyn negizgi fıgýra - ýchaskelik ınspektor» dep atap ótken bolatyn. Ol jergilikti halyqtyń problemalaryn sheship, qylmystardyń jolyn kesip, azamattardyń qaýipsiz bolýyn qamtamasyz etýi kerek. Biz ýchaskelik ınspektorlardyń quzyretin arttyramyz. Olarǵa zańnamalyq turǵyda ózdigimen tyıym salý, tártip buzǵan azamattarǵa shekteý qoıý quzyretteri beriledi. Máselen ýchaskelik ınspektor janjal shyǵarǵan otbasy múshesin úıden shyǵaryp jibere alady. Ýchaskelik ınspektor sheshim qabyldaı alatyndaı baptardyń sany arttyrý kózdelgen», - dedi Erlan Turǵymbaev Memleket basshysynyń Qazaqstan halqyna joldaýynda aıtylǵan tapsyrmalaryn iske asyrý barysy týraly ótken baspasóz máslıhatynda.
Mınıstrdiń aıtýynsha ishki rezervtiń, ıaǵnı shtatty qaıta bólý esebinen eldegi ýchaskelik ınspektorlardyń sanyn qalypty normaǵa deıin jetkizý josparlanǵan.
«Odan bólek ýchaskelik ınspektor laýazymy merzimin 5 jylǵa deıin bekitý kózdelgen. Bul óte mańyzdy. Sonymen qatar ınspektorlarmen birge ákimdiktermen birge jańa ýchaskelik beketterdi salý (onyń ishinde turǵyn úılermen qosylǵan) kózdelip otyr», - dedi ol.
Eske sala ketsek Memleket basshysy Qasym-Jomart Toqaev Qazaqstan halqyna Joldaýynda ýchaskelik ınspektordyń mártebesin kóterý kerektigin málim etken edi.
«Ýchaskelik ınspektordyń mártebesin zańnamalyq turǵyda kóterip, oǵan nátıjeli jumys isteý úshin múmkindik berý kerek. Ol azamattarǵa tanys, qoljetimdi jáne bedeldi bolýy kerek», - dedi Prezıdent.