Elimizde zańdy tulǵalardyń menshik quqyqtary jarııaly bolýy múmkin
NUR-SULTAN. QazAqparat - QR Parlamenti Májilisinde «Qazaqstan Respýblıkasynyń keıbir zańnamalyq aktilerine bıznes ahýaldy jaqsartý máseleleri boıynsha ózgerister men tolyqtyrýlar engizý týraly» zańynyń jobasy tanystyrylýda, dep habarlaıdy QazAqparat tilshisi.
«Zańnamalyq bastamalar «Doing Business» reıtınginiń 8 ındıkatory áreket etetin 39 normatıvtik quqyqtyq aktige 197 túzetýdi, sondaı-aq básekelestikke kedergi keltiretin tosqaýyldardy joıý jáne monopolııaǵa qarsy retteý tıimdiligin arttyrý normalaryn kózdeıdi», - dedi zań jobasyn tanystyrǵan QR Ulttyq ekonomıka vıtse-mınıstri Jasulan Mádıev.
Onyń atap ótýinshe, 8-toptama aıasynda bıznesti damytý úshin qolaıly jaǵdaılar jasaý maqsatynda jyljymaıtyn múlikke salynatyn aýyrtpalyqtar týraly aqparatqa jappaı qoljetimdilikti ashý, sondaı-aq zańdy tulǵalarǵa jyljymaıtyn múlikke menshik quqyqtary týraly aqparatqa jappaı qoljetimdilikti ashý reformalary kózdeledi.
«Úzdik halyqaralyq tájirıbege sáıkes menshik quqyqtary týraly aqparat barlyq tulǵalar úshin erkin qoljetimdilikte ornalasqan. Atalǵan reformanyń bes jyl boıy Qazaqstanda iske asyrýǵa usynylǵanyn atap ketken jón. Búginde biz atalǵan reformany bastapqy kezeńde tek zańdy tulǵalar boıynsha ǵana iske asyrýdy josparlap otyrmyz», - dedi Jasulan Mádıev.
