Elimizde zań jobalarynyń áleýmettik-ekonomıkalyq saldarlaryn saraptaýdy engizý máselesi talqylanady
ASTANA. 11 qarasha. QazAqparat - 2010 jyldyń 12 qarashasynda «Rixos President Astana» qonaq úıinde («Jeruıyq» zaly) «Qazaqstan Respýblıkasynyń qabyldanatyn zań jobalarynyń áleýmettik-ekonomıkalyq saldarlaryn baǵalaý jáne ǵylymı ekonomıkalyq saraptaý» taqyrybyna arnalǵan dóńgelek ústel ótkiziledi, dep habarlady QR Ekonomıkalyq damý jáne saýda mınıstrliginiń baspasóz qyzmeti.
Shara barysynda qabyldanatyn zań jobalarynyń áleýmettik-ekonomıkalyq saldarlaryna baǵalaý jasalady, sondaı-aq, zań jobalaryna ǵylymı-ekonomıkalyq saraptaýdy engizý máseleleri talqylanady.Qazaqstanda zań jobalary boıynsha ǵylymı quqyqtyq, jemqorlyqqa qarsy, krımınologııalyq saraptamalar, halyqaralyq sharttarǵa sáıkestiligine saraptama júrgiziledi. Zań jobalaryna ǵylymı ekonomıkalyq saraptamany engizý sheshim qabyldaǵan kezde ázirlengen zań jobalarynyń maqsattylyǵyn, tıimdiligin, árekettiligin tekserýde júıelik ádisti qamtamasyz etedi.
Dóńgelek ústeldiń jumysyna Qazaqstan Respýblıkasy Parlamentiniń depýtattary, Prezıdent Ákimshiliginiń ókilderi, ortalyq memlekettik organdardyń basshylary, saıası partııalardyń ókilderi, jeke kásipkerlik sýbektileriniń, qoǵamdyq jáne halyqaralyq uıymdardyń, ǵylymı mekemelerdiń birlestikteri, BAQ, sonymen qatar Qazaqstannyń jetekshi sarapshylary men ǵalymdary qatysady.
