Elimizde zań shyǵarýdyń qoldanystaǵy rásimderin ońtaılandyratyn normalar engizildi
NUR-SULTAN. QazAqparat – Parlament Májilisiniń jalpy otyrysynda «Qazaqstan Respýblıkasynyń keıbir zańnamalyq aktilerine normashyǵarmashylyqty jetildirý máseleleri boıynsha ózgerister men tolyqtyrýlar engizý týraly» zań jobasy ekinshi oqylymda maquldandy, dep habarlaıdy QazAqparat tilshisi.
Zań jobasy halyqaralyq tájirıbeni eskere otyryp, Qazaqstanda normashyǵarmashylyq praktıkasyn reformalaý maqsatynda ázirlendi. Quqyq qoldaný praktıkasyndaǵy problemalardy joıý, vedomstvoaralyq úılestirýdiń tıimdiligin arttyrý jónindegi birqatar mindetterdi sheshý usynylady. Zań jobasynda azamattardy zańnamalyq bastamalardy talqylaý protsesine tartý praktıkasyn jetildirýge, zań shyǵarýdyń qoldanystaǵy rásimderin ońtaılandyrýǵa múmkindik beretin normalar engiziledi.
Zań jobasynyń negizgi erejeleriniń biri zańnama aldyndaǵy taldaý nysany retinde zań jobasynyń tujyrymdamasy máselesin aıqyndaý bolyp sanalady. Zań jobasyn ázirleýshi memlekettik organnyń konsýltatıvtik qujatty oǵan tıisti taldamalyq materıaldardy qosa bere otyryp qalyptastyrý jáne ony jurtshylyqpen talqylaý mindeti belgilenedi. Talqylaý qorytyndysy boıynsha memlekettik organdar problemalardy jáne olardy sheshýdiń usynylatyn joldaryn pysyqtaıdy.
Zańnamalyq aktiler jobalarynyń ǵylymı saraptamasyn uıymdastyrýdyń túbegeıli jańa modeli engiziledi. Ǵylymı quqyqtyq saraptamany sarapshylar tiziliminde turǵan adamdar júrgizýi tıis, al sarapshyny tańdaý rásimin sarapshynyń reıtıngi men onyń ǵylymı jetistikterin eskere otyryp, mamandandyrylǵan aqparattyq júıe júrgizetin bolady.
Zań jobasynda «E-zańnama» elektrondyq júıesi engiziledi, ol zań jobalaryn ázirleýdi barlyq ázirleý kezeńderinde (zań jobasynyń tujyrymdamasyn talqylaýdan bastap oǵan qol qoıylǵanǵa deıin) súıemeldeıdi, bul zańdar men normatıvtik quqyqtyq aktilerdiń jobalaryn ázirleý men talqylaýǵa jumsalatyn ýaqytty qysqartýǵa múmkindik beredi.
Zań jobasymen jumys isteý barysynda depýtattar qujat jobasynyń mazmunyn jaqsartýǵa baǵyttalǵan birqatar túzetýler engizdi.
Oǵan sáıkes Úkimet engizgen zań jobasyn Parlamentte qaraý barysynda ortalyq memlekettik organdardyń ýákiletti adamdaryna Úkimet basshylyǵymen aldyn ala kelisilgennen keıin oǵan ózgerister jáne tolyqtyrýlar engizýge bastamashylyq jasaý quqyǵy beriletin normany depýtattar alyp tastady. Sebebi, zań jobalaryna ózgerister men tolyqtyrýlar engizý quqyǵy depýtattyq korpýsqa tıesili.
Parlament depýtattarynyń zań shyǵarý bastamasy tártibimen engizilgen zań jobalary, sondaı-aq depýtattyq túzetýler boıynsha retteýshilik áserdi taldaý júrgizý máselelerin sheshý usynylady.
Budan basqa, quqyqtyq olqylyqtardy bolǵyzbaý, zań jobasynyń normalaryn bir-birine jáne basqa da zańnamalyq aktilerge sáıkes keltirý maqsatynda redaktsııalyq, naqtylaýshy sıpattaǵy túzetýler engizildi.
