Elimizde ystyq aýa raıy aldaǵy kúnderi de saqtalady
ASTANA. QazAqparat - Jaz aıy Qazaqstanda ystyq aýa raıymen bastaldy.
«Qazgıdromet» RMK derekterine súıensek, demalys kúnderi aýa temperatýrasy +30-35º deıin kóterildi. Batys jáne ońtústik aımaqtarda ol +38-40º-qa deıin jetti. Bul normadan +3-6º-qa joǵary. Batysta jáne soltústik-batysta +7-10º normadan joǵary boldy. Tek shyǵys pen ońtústik-shyǵysta temperatýra kópjyldyq ortasha kórsetkishten 2-5º-qa tómen kórsetkishti kórsetti. Aldaǵy úsh táýlikte batys, soltústik oblystardyń keı jerlerinde kún kúrkirep, ótkinshi jaýyn jaýatyndyǵyna qaramastan, ystyq aýa raıy saqtalady, jeldiń ekpini 13-20 m/s deıin kúsheıedi. Shyǵys jáne ońtústik-shyǵys óńirlerde antıtsıklon taralady. Osy kezeńde Qazaqstannyń barlyq aýmaǵynda aýa temperatýrasy normadan 3-10º-qa joǵary bolmaq.
