Elimizde volonterlik qyzmetti qoldaý standarty ázirlenedi – Aıda Balaeva
«El Prezıdentiniń bastamasymen qolǵa alynǵan volenterlik qozǵalys búginde jalpyhalyqtyq qoldaýǵa ıe bolǵan jobaǵa aınaldy. Ásirese, byltyrǵy pandemııa kezinde halyqtyń shynaıy qaıyrymdylyq qasıeti men elge degen jeke jaýapkershiligi erekshe bilindi. Osy 1 jyldyń ishinde volonterlik qyzmettiń qarqyny artyp, baǵdarlamalar men jobalardyń aýqymy aıtarlyqtaı keńeıe tústi. Atap aıtqanda, volonterlik uıymdardyń sany 3 esege, eriktiler qatary 4 esege kóbeıdi. Pandemııa kezinde 500 myńǵa jýyq azamat volonterlik qyzmetke qatysyp, 1 mln-nan astam janǵa naqty kómek kórsetildi. 80 myńnan astam azyq-túlik sebeti, 4,5 mln medıtsınalyq jabdyq taratyldy», - dedi mınıstr.
Onyń atap ótýinshe, osy qalyptasqan aýqymdy múmkindikter men adamı resýrsty saqtaı otyryp, Volonterlikti damytýdyń jol kartasy aıasynda eriktiler qozǵalysyn qoldaý bıyl da óz jalǵasyn taýyp jatyr.
«Bul Nur Otan partııasynyń da saılaýaldy baǵdarlamasynda kórsetilgen basymdyqtardyń biri. Jol kartasynyń keshendi is-sharalar toptasy aıasynda birqatar baǵyt aıqyndaldy. Atap aıtqanda, birinshi – zańnamalyq deńgeıde ózgerister engizý. Onyń aıasynda oqýǵa tapsyrý men jumysqa ornalasý kezinde jeńildikter qarastyrý, volonterlerdiń quqyǵy men mindetterin keńeıtý, eriktilerdiń eń tómengi jas shegin belgileý jáne korporatıvtik volonterlik normalary sııaqty jańashyldyqtar da qarastyrylǵan. Jarııa talqylaýdan ótken soń zań jobasy 1-shildege deıin Úkimet qaraýyna engiziletin bolady. Buǵan qosa, volonterlik qyzmetti qoldaý standarty ázirlenip, onyń negizinde memlekettk organdarǵa osy baǵyt boıynsha tıisti baǵyt-baǵdar beriletin bolady», - dedi Aıda Balaeva.
Mınıstrdiń aıtýynsha, ekinshi – volonterlik ınfraqurylym.
«Volonterler qurǵan respýblıkalyq jáne 17 óńirlik front-keńseler óz jumysyn jalǵastyrýda. Bıylǵy jyldyń 1-jartyjyldyǵynda 113 myńnan astam volonterdiń qatysýymen 6 myńǵa jýyq is-shara ótkizildi. Úshinshi – volonterlik jobalar men bastamalardy iske asyrý. Jol kartasy aıasynda jalpy somasy 528,3 mln teńgeni quraıtyn 40-tan astam jobany iske asyrý qarastyrylǵan. Aqparat mınıstrligi tarapynan 13 volonterlik jobaǵa 438,6 mln teńge bólinip otyr. Onyń aıasynda janýarlarǵa janashyrlyqty kózdeıtin «Birge aıala», aǵa urpaqty volonterlik qyzmetke shaqyratyn «Kúmis» volonterlik jobalary, sonymen qatar basqa da ózekti taqyryptar boıynsha 130-dan astam shaǵyn granttar qarastyrylǵan», - dedi ol.
