Elimizde vırýstyq gepatıttermen kúres aılyǵy júrip jatyr
ASTANA. 29 shilde. QazAqparat - Elimizde 28 shildeden bastap vırýstyq gepatıttermen kúres aılyǵy bastaldy. 28 tamyzǵa deıin jalǵasyp,
vırýstyq gepatıtterdiń aldyn alýǵa baǵyttalǵan shara 28 shilde - dúnıejúzilik gepatıtpen kúres kúnine oraılastyrylǵan. Bul týraly Salaýatty ómir saltyn qalyptastyrý ortalyǵynyń baspasóz qyzmetinen habarlandy.
Aılyq aıasynda respýblıkanyń barlyq óńirinde halyqpen vırýstyq gepatıttiń aldyn alý boıynsha aqparattyq jumystar júrgizý, medıtsına qyzmetkerleri úshin oqytý semınarlaryn, medıtsınalyq mekemelerde «ashyq esik kúnderin» ótkizý jáne halyqty skrınıngtik tekserý (táýekel toptary boıynsha) josparlanǵan.
«Vırýstyq gepatıtter - A, B, C, D jáne E gepatıtteri ataýymen belgili juqpaly aýrýlar toby. Álemde mıllıondaǵan adam gepatıt vırýstarynyń birin juqtyrǵan. Ol sozylmaly nemese ótkir ınfektsııa týdyrady, jyl saıyn bul indetten 1,4 mln adam kóz jumady», - delingen baspasóz baıanynda.
Sanıtarlyq-epıdemıologııalyq saraptaý jáne monıtorıngtiń ǵylymı tájirıbelik ortalyǵynyń habarlaýynsha, Qazaqstanda 2012 jyly A ótkir vırýstyq gepatıtiniń (VGA) 1452, V ótkir vırýstyq gepatıtiniń V (VGV) 208, S ótkir vırýstyq gepatıtiniń (VGS) 67 jaǵdaıy tirkeldi.
A jáne V vırýstyq gepatıtterin vaktsına paıdalaný arqyly tejeýge bolady. Qazaqstanda bul vırýstarǵa qarsy egý jumystary respýblıkalyq profılaktıkalyq ekpeleriniń ulttyq kúntizbesi boıynsha bala týǵannan keıin alǵashqy kúnderi júrgiziledi.
