Elimizde veterınarııa qyzmetkerleriniń kásibı merekesi bekitilmek

ASTANA. QazAqparat – Qazaqstanda veterınarııa qyzmetkerleriniń kásibı merekesi bekitilýi múmkin. Bul týraly ashyq talqyǵa shyǵarylǵan Úkimet qaýlysynda jazylǵan, dep habarlaıdy QazAqparat tilshisi.

«Epızootııalyq jaǵdaıdyń saýlyǵy jáne mal sharýashylyǵy ónimderiniń eksporttyq áleýetiniń artýy qaýipsiz ónim óndirýdi qamtamasyz etetin veterınarııa júıesimen tyǵyz baılanysty. Búgingi kúni Qazaqstanda Malshylar kúni, Orman sharýashylyǵy qyzmetkeri kúni, Aýyl sharýashylyǵy, tamaq jáne qaıta óńdeý ónerkásibi qyzmetkerleri kúni, Balyq sharýashylyǵy qyzmetkerleri kúni sııaqty kásibı merekeler bar.

Alaıda, búgingi kúni veterınarııa salasyndaǵy qyzmetkerlerdiń ózderiniń kásibı merekelerin atap ótý múmkindigi joq jáne osyndaı mereke bolmaǵandyqtan biryńǵaı kásibı qoǵamdastyq salasyna ózderiniń qatystylyǵyn sezinbeıdi. Sondyqtan 10 shilde - «Veterınarııa týraly» QR Zańy qabyldanǵan kúndi Veterınarııa qyzmetkeri kúni dep aıqyndaýdy usynamyz», - dep jazylǵan qujatta.

Aýyl sharýashylyǵy mınıstrliginiń málimetine saı, atalǵan merekeni bekitý sala qyzmetkerlerin yntalandyrýǵa jáne veterınarııanyń strategııalyq mańyzdylyǵyn aıqyndaýǵa sep bolmaq.

Qujatty ashyq talqylaý 14 jeltoqsanǵa deıin jalǵasady.