Elimizde veterınar mamandar qansha jalaqy alady

NUR-SULTAN. QazAqparat – Qazaqstanda veterınar dárigerlerdiń jalaqysy arttyrylady. Bul týraly QR Aýyl sharýashylyǵy vıtse-mınıstri Rústem Qurmanov aıtty, dep habarlaıdy QazAqparat tilshisi.

«Agrarlyq sektordaǵy eń tómengi jalaqy alatyn mamandardyń biri – veterınar dárigerler. Respýblıka boıynsha mal dárigerleriniń ortasha jasy 40-55 jasty quraıdy. Veterınarııa sektorynda joǵary bilikti jas kadrlar jetispeıdi. Laıyqty jalaqynyń bolmaýy, qıyn eńbek jaǵdaıy jáne aýyldyq jerlerde ınfraqurylymnyń damymaýy jastar arasynda mal dárigeri kásibiniń suranysqa ıe emes ekenin kórsetip otyr», - dedi QR Aýyl sharýashylyǵy vıtse-mınıstri Rústem Qurmanov OKQ-de ótken brıfıngide.

Mınıstr orynbasary keltirgen málimetke sáıkes, bıyl veterınarlardyń jalaqysy 33,4% artty. Jyl sońyna deıin eńbekaqyny taǵy 60% kóterý josparlanyp otyr.

«Veterınar dárigerlerdiń ortasha aılyǵy ár óńirde ártúrli. Qyzylorda oblysynda ortasha 98 myń teńge bolsa, Pavlodar oblysynda jalaqy 206 myń teńgege deıin barady», - deıdi ol.

Joǵaryda atalǵan máseleni ońtaıly sheshý úshin aýyl sharýashylyǵy mınıstrligi kelesi sharalardy qabyldamaq:

- báseke joq aýdandyq veterınarııa stantsııalary men beketterde aqyly qyzmetterdiń kólemin ulǵaıtý. Ol úshin barlyq jerde aqyly qyzmet túrleriniń tarıfi bekitiledi;

- tıisti zańnamalyq bazany qabyldaı otyryp, kelesi jyldan bastap veterınar mamandardyń laýazymdyq jalaqysyna qosymsha 50% tólemaqy jasaý;

- zııandy eńbek jaǵdaıy úshin memlekettik kommýnaldyq mekemelerdiń bazalyq laýazymdyq jalaqysyna 140% qosymsha aqy tóleý qarastyrylady;

- sondaı-aq sala mamandaryna saýyqtyrý quraly retinde 2 aılyq jalaqy tóleýdi júzege asyrý josparlanyp otyr.