Elimizde valıýtalyq baqylaý anyq emes - depýtat
ASTANA. QazAqparat - Májilis depýtaty Omarhan Óksikbaev zańsyz valıýtalyq operatsııalarmen qamtylǵan kompanııalarǵa qatysty pikir bildirdi, dep habarlaıdy QazAqparat.
«Búginde valıýtalyq baqylaý bizde anyq emes. Ekinshi deńgeıli bankter 35 kompanııa boıynsha isterdi berdi. 30-y boıynsha operatsııalardyń kúmándiligi rastaldy. Bul neni bildiredi? Bul naǵyz tonaýshylyq, ıaǵnı 35-tiń ishinde 30-y kúmándi operatsııalarǵa ushyraǵan. Ekinshi deńgeıli bankter bul qarjylyq quıtyrqylardy yntalandyrady, ıaǵnı olarmen birlese is-qımyl jasaıdy. Sebebi bankter basqalaryna qaraǵanda osy valıýtalyq operatsııalarda kóp komıssııalyq tabys alady», - dep toqtaldy depýtat Senatta valıýtalyq baqylaý taqyrybyna arnalǵan jıynda.
Osy oraıda ol ekinshi deńgeıli bankter osy qarjy aýdarymdaryna múddeli ekenin sóz etti.
«Birinshiden, valıýtalyq operatsııalarda olarda qomaqty tabystylyq júredi. Ekinshiden, bul kompanııalar kóbine ekinshi deńgeıli banktermen úlestes jáne bul jaıynda eshkim de jaq ashpaıdy. Osy boıynsha eshbir bankır osy úshin qandaı da bir jaýapkershilikke tartylmady. Іs júzinde olardyń barlyǵy qarjylyq ahýalǵa jaýapty bolýy tıis. Olar bir orynnan ekinshisine aýysyp keledi, al qomaqty qarjy jınap alǵandar shetel asyp ketti. Áli kúnge deıin osy másele sheshimin tappaı keledi, ıaǵnı bul jaǵdaıǵa núkte qoıatyn ýaqyt jetti», - dedi depýtat.
