Elimizde vaktsınatsııaǵa qarsy lobbı óte kúshti bolyp tur – Bekshın
«Konstıtýtsııa bárine birdeı. Barlyǵynyń pikirine qulaq asýymyz kerek. Halyqtyń da, jýrnalısterdiń de, ǵalymdardyń sózin tyńdaǵan jón. Biz bolmasaq, halyqaralyq tájirıbeni halyqqa kim aıtady? Ustazdarymnyń biri Afrıka elderiniń birinde medıtsınalyq kómek berýmen aınalysty. Sol maǵan: «Aýrý tarap ketken kezde bir túnde 9 bala shetinedi. Sonda óli balasyn qushaqtap turyp, qaıǵydan júzderi tas bop qatyp qalǵan analardy kórdim. Ol elde soǵys bolyp jatyr edi. Men sonda «vaktsınatsııa tıimsiz» degen sózdi aıtqan adamdy syrtqa shyǵaryp atyp tastaýǵa daıyn boldym» degen áńgime aıtty. Kórdińiz be? Sondyqtan, bizdiń bárimiz aýrýdyń aldyn alýǵa, vaktsınatsııanyń qajet ekenin halyqqa eskertýimiz kerek. Qatty da bolsa shyndyqty aıtyp turmyn», - dedi Jandarbek Bekshın OKQ-da ótken baspasóz máslıhatynda.
Bas memlekettik sanıtarııalyq dáriger aqshanyń sońyna túsip, halyqqa durys aqparat bermeı jatqandardy synady.
«Biz halyqtyń densaýlyǵyn oılaýymyz kerek. Eń birinshi kezekte, jýrnalısterden suraımyn! Sebebi, antıvaktsıonal lobbıi óte kúshti bolyp tur. Kórip otyrsyzdar, qandaı stsenarııler jazylyp jatyr. Ol úshin aqsha tólenip jatqany anyq qoı. Tipti antıvaktsıonaldy nasıhatqa kásibı akterlar qatysýda. Bári de aýtızm jaıly aıtady. Kezinde AQSh-tyń jalǵan ǵalymy Endıý Ýıkfıldtiń eńbegin Tehas soty joqqa shyǵaryp, dáriger sertıfıkatyn aıyrdy. Al sony nasıhattaǵan ǵylymı basylymnyń redaktory keshirim surady. Ol jerde aýtızmge qatysty eshteńe bolmaǵan. Bul – tek syltaý edi», - dedi Jandarbek Bekshın.
Eske sala ketsek, buǵan deıin Jandarbek Bekshın ekpe jasalmaǵan balalar balabaqshalarǵa kirgizilmeıtinin málim etken edi.