Elimizde úsh baǵyttaǵy avtojol rekonstrýktsııalanyp, 4 jolaqty bolady
Alqaly jıyn barysynda avtojol salasyn odan ári damytý boıynsha qalyptasqan jaǵdaı men aldaǵy ýaqytqa belgilengen josparlar, atap aıtqanda basymdyq berilgen jobalardy iske asyrý, joldardy rekonstrýktsııalaýǵa arnalǵan jerlerdi belgileý, sondaı-aq jol boıynda jolaýshylarǵa qyzmet kórsetetin nysandar jelisin keńeıtý boıynsha ózekti máseleler talqylandy.
Keńeıtilgen keńeske Avtomobıl joldary komıtetiniń, «QazAvtoJol» UK» AQ basshylary, oblys ákimderiniń orynbasarlary, avtojoldardyń qurylysyna qatysatyn otandyq merdigerlik uıymdardyń, sondaı-aq janarmaı quıý beketteri men jol boıyndaǵy servıs obektileriniń qurylysyna ınvestıtsııa quıatyn kompanııalardyń ókilderi qatysty.
Atalǵan salany damytýdyń basymdyqtary týraly aıta kele, vedomstvo basshysy 2029 jylǵa deıin 4,7 myń shaqyrym jol salý jáne rekonstrýktsııalaý jónindegi jobalardy kezeń-kezeńimen iske asyrý jumystaryn bastaý josparlanyp otyrǵanyn aıtty. Ol qazaqstandyqtardy sapaly joldarmen qamtamasyz etý mindeti Memleket basshysy Qasym-Jomart Toqaevtyń erekshe baqylaýynda ekenin jáne Prezıdenttiń saılaýaldy baǵdarlamasynda bekitilgenin atap ótti.
Sonymen birge jańadan qurylǵan mınıstrliktiń basshysy «Aqtóbe-Ulǵaısyn-Qyzylorda» (1363 km), «Jezqazǵan-Qaraǵandy» (513 km) jáne «Saryaǵash qalasyn aınalyp ótý» (102 km) avtojoldaryn rekonstrýktsııalaý jónindegi jobalar basymdyq beriletin jobalardyń qataryna qosylǵany týraly málimdedi.
Marat Qarabaevtyń aıtýynsha, atalǵan joldardy 4 jolaqty qozǵalyspen qamtamasyz etip, I tehnıkalyq sanatqa aýystyrý týraly sheshim kólik qozǵalysy qarqyndylyǵynyń artýyna baılanysty qabyldanǵan.
Respýblıkanyń jol-kólik áleýetin iske asyrý jónindegi josparlarǵa sáıkes kólik mınıstrligi respýblıkalyq mańyzy bar avtojoldar boıyndaǵy qyzmet kórsetý nysandaryn damytý sheńberindegi jumysty belsendi túrde jalǵastyratyn bolady.
Búgingi tańda elimizde jol boıyndaǵy servıs1652 obektini qamtyp otyr, onyń 78 paıyzy ulttyq standart talaptaryna jaýap beredi. Osylaısha, jyldyń sońyna deıin taǵy 78 nysandy iske qosýdy josparlanyp otyr. Onyń ishinde 53-i jeke ınvestıtsııalardy tartý esebinen iske qosylatyn bolady. Sonymen qatar joldardy qaıta jańartý jáne jóndeý jobalary sheńberinde jańadan 25 sanıtarlyq-gıgıenalyq torap iske qosylmaq. Bul ulttyq standartqa sáıkes keletin jol boıyndaǵy servıs obektileriniń úlesin 82 paıyzǵa deıin arttyrady.
Budan bólek 2029 jylǵa qaraı standartqa sáıkes keletin 200-den astam jańa nysan salý josparda bar.
Keńes qorytyndysy boıynsha mınıstr Marat Qarabaev ýchaskelerdi maqsatsyz qoldaný jaǵdaılaryn boldyrmaý maqsatynda avtomobıl joldaryn rekonstrýktsııalaý úshin jerlerdi aldyn ala rezervke qoıý jóninde tapsyrma berdi.