Elimizde úsh aı ishinde 63 zańsyz oıyn mekemesi jabylǵan
Dúnıejúzilik densaýlyq saqtaý uıymy lýdomanııany nemese qumar oıyndarǵa táýeldilikti resmı túrde patologııalyq táýeldilik dep tanydy. Qumar oıyndarǵa táýeldilik bizdiń respýblıkamyzda da taralǵan.
«Qazaqstandaǵy qumar oıynshylardyń sany 350 myńǵa jýyq. Jáne osy sanmen shektelmeıdi. Olardyń kópshiligi jasóspirimder. Memleket turaqty túrde zańsyz oıyn bıznesimen kúres júrgizip, sol arqyly halyqty qumar oıynǵa táýeldiliktiń zııandy áserinen qorǵap keledi. Osylaısha, oıynǵa táýeldiliktiń jáne zańsyz oıyn bıznesiniń damý sebepterimen kúres aıasynda Qazaqstanda 2021 jyldyń 1 toqsanynda qarjylyq baqylaý organdary 49 qylmystyq is qozǵady», delingen habarlamada.
Vedomstvonyń málimetinshe, 63 zańsyz oıyn mekemesi jabylǵan. Zańsyz aınalymnan 300-den astam oıyn avtomaty, termınal, poker ústeli, kompıýter er sekildi qurylǵylar tárkilengen.
«Barlyq termınaldar zańǵa qaıshy emes. Ulttyq operator el aýmaǵynda óziniń termınaldary arqyly utys oıynyn ótkizý quqyǵyna ıe. Olar sarǵysh-kók tústi. Mindetti túrde logotıp, nómir jáne QR kod bolýy kerek.
Zańsyz oıyn bıznesimen kúresýde agenttikke zańsyz turǵan oıyn avtomattary týraly aqparat joldaıtyn eldiń belsendi azamattary da mańyzdy ról atqarady», delingen habarlamada.
Osyǵan baılanysty, Qarjylyq monıtorıng agenttigi basqa da azamattardy kómek berýge shaqyrady.
«Árbir azamatty áleýmettik jaýapkershilik tanytyp, osyndaı faktiler jaıly habarlaýǵa shaqyramyn. Árqaısysymyz balalarymyzdy qumar oıyndarǵa táýeldiliktiń zııandy áserinen qorǵaı alamyz», - dedi agenttik tóraǵasy Janat Elımanov.
Eger siz turatyn jerde oıyn apparaty ornalastyrylsa, ol týraly agenttiktiń resmı akkaýntterine (Facebook, Instagram) foto jáne mekenjaıdy joldaýǵa nemese +7 (7172) 70-84-78 senim telefonyna habarlassańyz jetkilikti.