Elimizde úsh aýysymdy mektepter sany kóbeıip keledi - BǴM
ASTANA. QazAqparat - Parlamentte QR Bilim jáne ǵylym mınıstrliginiń ókilderi men Májilis depýtattary elimizdegi apattyq jáne úsh aýysymdy mektepterdiń máselesin talqylady, dep habarlaıdy «QazAqparat» HAA tilshisi.
BǴM vıtse-mınıstri Bıbıgúl Asylova keltirgen málimetterge sáıkes, 2015 jyldyń 1 qazanyndaǵy kórsetkish boıynsha elimizde apattyq jáne úsh aýysymdaǵy 156 mektep (69 apattyq, 87 úsh aýysymda) bolǵan.
«Biz Ulttyq qor aıasynda arnaıy jospar quryp, 2015 jyldan bastap barlyq máselesi bar mektepterdiń jumysyn sheship kelemiz. 2015 jyldan bastap 12, 2016 jyldan bastap 49 mektep, 2017 jyldan bastap 65, 2018 jyly 19 mekteptiń máselesin birjaqty etý josparlanǵan. Ulttyq qordyń qarjylandyrýynyń arqasynda 159 mekteptiń máselesi 2018 jyly sheshiledi. Biraq, ekinshi suraq - jyl saıyn máseleli jańa mektepter paıda bola bastady. Demogafııalyq ahýal men ýaqyt óte kele mektep ǵımarattarynyń eskirýine baılanysty bul jumystardyń týyndaýy zańdy», - deıdi QR BǴM vıtse-mınıstri Bıbıgúl Asylova.
Vıtse-mınıstr óz sózinde mektepke baılanysty máseleler qaı jaqta ózekti ekenin tilge tıek etti.
«Úsh aýysym boıynsha mektepterge keletin bolsam, qazirgi ýaqytta respýblıkadaǵy 188 mektep úsh aýysymǵa aýysýy múmkin. Óıtkeni, olarda oqýshylar ornynyń jetispeýshiligi seziledi. Olar Ulttyq bilim bazasyna apattyq nemese úsh aýysymdy mektep retinde enýi yqtımal. Úsh aýysymdy mektep boıynsha másele joq oblystar bar. Ol qatarǵa Qostanaı jáne Pavlodar oblystaryn jatqyzýǵa bolady. Al Ońtústik Qazaqstan, Aqtóbe, Almaty oblystarynda jáne Astana qalasynda bul jumys ózekti. Qolymyzdaǵy qazirgi málimet boıynsha, Almatyda 1 qyrkúıekte 20 mektep paıdalanýǵa berilgenimen, qazirdiń ózinde ol jaqta bilim ordalarynyń 10-y apattyq jaǵdaıdaǵy tizimge enýi múmkin. Máselen, Almatyda Eńbekshiqazaq aýdanynda 1 qyrkúıekte ashylǵan mektep birden úsh aýysymdy bolyp ketti. Nelikten? Sebebi, jospar qurǵan kezde atalǵan óńirde halyq az bolǵan. Al sońǵy 2,5-3 jylda ol jerde halyq kóbeıip ketkendikten, mektepke bala birden tolyp ketti», - deıdi vıtse-mınıstr.
