Elimizde Ulttyq biryńǵaı testileýden aınalyp ótip, jedeldetilgen baǵdarlamamen joǵary bilim alýǵa tyrysatyndar az bolmaı otyr

Bul týraly búgin Úkimette tehnıkalyq jáne kásibı bilim berý júıesinde sapany arttyrýdyń is-qımyl josparyn tanystyrý kezinde Bilim jáne ǵylym mınıstri Baqytjan Jumaǵulov málim etti.

Mınıstrdiń aıtýynsha, zerdelengen sharalardyń málimetine qaraǵanda elimizde bilim alǵannan keıin ekonomıka orta bilimmen - 21 paıyz, tehnıkalyq jáne kásibı bilimmen - 41 paıyz, joǵary bilimmen 38 paıyzǵa jyl saıyn tolyǵady. Bul kórsetkish kóptegen damyǵan elderdiń jumys isteıtin halqynyń qurylymyna sáıkes keledi. ıAǵnı Qazaqstan da olardyń kórsetkishine jaqyndap otyr. «Alaıda elimizdiń joǵary oqý oryndarynda syrttaı bilim berý qurylymynyń bolýy Qazaqstandaǵy jaǵdaıdy túbegeıli ózgertedi. Qazirgi kezde Qazaqstandyq stýdentterdiń jartysyna jýyǵy, ıaǵnı 46 paıyzy nemese 285 myńy syrttaı bólimde oqıdy. Sonymen qatar olardyń ishinde tehnıkalyq jáne kásibı bilim berý bazasynda oqıtyndar sany joǵary. Bul 60 paıyzǵa jýyq kórsetkishti quraıdy», - dedi mınıstr.

B.Jumaǵulovtyń sózine qaraǵanda, tehnıkalyq jáne kásibı mekemelerinde jastardyń jartysy oqyp jatyr. «Biraq ta olardyń jartysy, ıaǵnı 45 paıyzy joǵary oqý oryndaryna aýysyp otyrady. Nátıjesinde, tehnıkalyq jáne kásibı bilim kadrlarynyń jyl saıynǵy tolyǵýy 27 paıyzǵa tómendeıdi. Atap aıtqanda, nashar daıyndalǵan jastardyń kóbi osyny paıdalanyp, Ulttyq biryńǵaı testileýge qatyspaı, sondaı-aq bilim alýǵa kóp shyǵyndanbaı, jedeltilgen ári qysqarǵan baǵdarlamamen osylaısha joǵary bilim alýǵa tyrysady», - dep toqtalyp ótti mınıstr. Nátıjesinde joǵary bilim alatyn kadrlar sany kúrt artyp otyr, bul ekonomıka qurylymyna sáıkes kelmeıdi. «Osy jaǵdaı memlekettik retteýdi qajet etedi», - dedi vedomstvo basshysy.