Elimizde Ulttyq aqparattyq dári-dármek ortalyǵy qurylady
ASTANA. Maýsymnyń 8-i. QazAqparat /Marlan Jıembaı/ - Elimizde Ulttyq aqparattyq dári-dármek ortalyǵy qurylady. Bul týraly búgin atalǵan vedomstvoda ótken baspasóz máslıhaty barysynda QR Densaýlyq saqtaý mınıstrliginiń Medıtsınalyq jáne dári-dármek qyzmetin baqylaý komıteti tóraǵasynyń orynbasary Larısa Pak málim etti.
«Qazaqstannyń densaýlyq saqtaý mınıstrligi densaýlyq saqtaý salasyn damytýdyń 2011-2015 jyldarǵa arnalǵan "Salaýatty Qazaqstan" memlekettik baǵdarlamasy aıasynda medıtsınalyq jáne farmatsevtıkalyq qyzmetkerlerdiń, sonymen qatar el halqyn senimdi ári der ýaqytyly aqparatpen qamtamasyz etý úshin ulttyq aqparattyq dári-dármek ortalyǵyn qurady», dedi ol óz sózinde.
Onyń paıymdaýynsha, biryńǵaı aqparattyq júıe mınıstrlikte dári-dármektiń turaqty statıstıkasynyń bolýyna jáne qansha qarjy kerektigine saraptama jasaýǵa múmkindik beredi.
Baǵdarlamanyń negizgi maqsaty Qazaqstan azamattarynyń densaýlyǵyn jaqsartý jáne eldiń áleýmettik-demografııalyq turaqty damýyn qamtamasyz etý úshin densaýlyq saqtaý júıesiniń básekelestik qabilettiligin qalyptastyrý bolyp tabylady. Budan buryn baǵdarlama Premer-Mınıstrdiń orynbasarynyń qatysýymen ótken Densaýlyq saqtaý mınıstrliginiń keńeıtilgen alqa májilisterinde, oblystardyń, medıtsına mekemeleri basshylarynyń, qoǵamdastyqtar jáne úkimettik emes uıymdar ókilderiniń qatysýymen ótken óńirlik keńesterde, densaýlyq saqtaý júıesiniń jumys semınarlary men konferentsııalarynda talqylanǵan edi. Atalǵan baǵdarlamany júzege asyrýǵa memleket bıýdjetinen 552,3 mıllıard teńge bólý josparlanyp otyr.
