Elimizde túri ózgertilgen oıyn avtomattary qoǵamdyq oryndarda zańsyz ornatylady - QR ІІM
ASTANA. QazAqparat - Qazaqstanda túrli saýda, oıyn-saýyq jáne qoǵamdyq oryndarda utysqa qolma qol aqsha beretin oıyn avtomattary zańsyz ornatylady.
Bul jaıynda QazAqparattyń resmı saýalyna oraı QR Іshki ister mınıstrliginiń baspasóz qyzmetinen habarlady.
Baspasóz qyzmetiniń aqparatyna qaraǵanda elimizdiń «Oıyn bıznesi týraly» zańyna sáıkes iri eldi mekenderdegi adam turmaıtyn úı-jaılarda oıyn avtomattaryn ornalastyrýǵa ruqsat berilgen. Al býkmekerlik keńselerde, adam turatyn úı-jaılarda sporttyq totalızatorlardy ornatýǵa joǵaryda atalǵan zańǵa sáıkes shekteý qoıylǵan.
«Bul saladaǵy problemalyq máselelerdiń biri oıyn avtomattarynyń qojaıyndary oıyn-saýyq qyzmetterin uıymdastyrý jeleýimen utys bolǵan jaǵdaıda qolma qol aqsha beretin túri ózgertilgen oıyn avtomattaryn ornatýynda bolyp otyr», - delingen resmı jaýapta.
QR ІІM aqparatyna qaraǵanda, búgingi kúni «Bıngo-loto» elektrondy lotereıa termınaldarynda ornatylǵan onlaın oıyndar keńinen taralǵan. Atalǵan apparattar ınternetke qosylǵan jáne shynaıy rejimde qumar oıyndaryn ótkizýge beıimdelip jasalǵan. Al bul QR Qylmystyq kodeksiniń 307 babynda qarastyrylǵan qylmystyq jaýapkershilikke sebep bola alady.
