Elimizde turǵyn úıdi jalǵa alý quny qymbattady
NUR-SULTAN. QazAqparat – Turǵyn úıdi jalǵa alýdyń eń joǵary baǵalary Nur-Sultan qalasynda tirkelse, eń tómen baǵalar Semeıde ekeni belgili boldy. Bul týraly QazAqparat tilshisi Finprom-ǵa silteme jasap habarlaıdy.
2020 jyldyń shilde aıynda jaıly jabdyqtalǵan úıdi jalǵa alýdyń ortasha baǵasy bir sharshy metr úshin 1,6 myń teńgeni qurady, bul ótken jylmen salystyrǵanda 9,5 paıyzǵa kóp. Maýsym aıymen salystyrǵanda, turýǵa jaıly baspanany jalǵa alý quny 0,4 paıyzǵa ósti.
Jóndelmegen turǵyn úılerdi jalǵa alýdyń ortasha baǵasy bir sharshy metr úshin 832 teńgeni quraǵan – bul ótken jylmen salystyrǵanda 4 paıyz qymbat. Aǵymdaǵy jyldyń maýsym aıymen salystyrǵanda, jalǵa alý baǵasy ózgerissiz qaldy.
Elimizdiń iri qalalary men megapolısteri arasynda jaıly jabdyqtalǵan turǵyn úıdi jalǵa alýdyń eń joǵary baǵalary elordada tirkelgen – bir sharshy metr úshin 3,1 myń teńge, bul byltyrǵy jylmen salystyrǵanda 10,3 paıyzǵa kóp. Baǵalary joǵary iri qalalar «úshtigine» sondaı-aq Almaty jáne Aqtaý qalalary kirdi.
Sonymen qatar, jaıly jabdyqtalǵan turǵyn úıdi jalǵa alý baǵalarynyń aıtarlyqtaı qymbattaýy Pavlodarda (jylyna birden 37,9 paıyzǵa, 1,7 myń teńgege deıin), Taldyqorǵanda (36,9 paıyzǵa, 1,7 myń teńgege deıin) jáne Tarazda (15,4 paıyzǵa, 1,2 myń teńgege deıin) baıqalyp otyr.
Al eń tómen baǵalar Semeı qalasynda belgilendi. Munda jaıly jabdyqtalǵan úıdi jalǵa alý baǵasy bir sharshy metr úshin 1,2 myń teńgeni qurap otyr, bul ótken jylmen salystyrǵanda 3,3 paıyzǵa kóp.
Jóndelmegen turǵyn úılerdi jalǵa alýdyń eń joǵary baǵalary elordada baıqalyp otyr – bir sharshy metr úshin 1,6 myń teńge. Bul ótken jylmen salystyrǵanda 3,6 paıyzǵa kóp.
Mundaı úılerdi jalǵa alýdyń eń tómen baǵasy Semeı qalasynda tirkeldi – bir sharshy metr úshin 594 teńge, byltyrǵy jylmen salystyrǵanda 2,6 paıyzǵa qymbat.
