Elimizde turaqtar men qoımalardy derbes múlik retinde sanaý usynyldy

ASTANA. QazAqparat – «Turǵyn úı-kommýnaldyq sharýashylyq máseleleri týraly» QR Zańyna engizilgen túzetýler negizinde turaqtar men qoımalardyń mártebesin bekitý usynylady. Bul týraly Ortalyq kommýnıkatsııalar qyzmetinde ótken brıfıngide Turǵyn úı-kommýnaldyq sharýashylyǵyn jańǵyrtý men damytýdyń qazaqstandyq ortalyǵy» AQ basqarýshy dırektory Marǵulan Ábdikárimov aıtty, dep habarlaıdy QazAqparat tilshisi.

«Zańmen jeke menshiktegi, biraq kondomınıým obektisiniń ortaq basqarýyndaǵy turaqtar men qoımalardyń mártebesin bekitý usynylady. Bul rette turaq pen qoımalardyń menshik ıeleri óz múlkin ustaýǵa qatysty shyǵystarǵa qatysýǵa mindetti. Oǵan qatysty tólem mólsheri ýákiletti organdar bekitken ádistemege sáıkes esepteletin bolady. Osyǵan baılanysty, zańǵa «qoıma» degen jańa uǵymdy engizý kózdelgen», - dedi Marǵulan Ábdikárimov.

Sonymen qatar, zańda úı keńesiniń ókilettigin kúsheıtý kózdeledi. Úı keńesi - alqaly organ sanalady. Onyń sheshimderi tıisti hattamamen bekitiledi jáne múlik ıeleri birlestiginiń tóraǵasy olardy oryndaýǵa mindetteledi.

«Zań jobasy kóppáterli turǵyn úıdi basqarý jáne kútip ustaý máselelerin jedel sheshý úshin úı keńesine belgili bir ókilettikterdi berýdi usynady. Eger jınalysta úı keńesine qandaı da bir sheshim qabyldaý kerek bolsa, onda ol tek osy ókilettikter berilgennen keıin ǵana múmkin bolady», - dep atap ótti Marǵulan Ábdikárimov.