Elimizde tuńǵysh ret «Bochcha» paralımpıadalyq sporttan chempıonat ótýde
NUR-SULTAN. QazAqparat - Elimizde tuńǵysh ret uıymdastyrylyp otyrǵan chempıonatta 80 parasportshy baq synaýda, dep habarlaıdy QazAqparat tilshisi.
Qalalyq mádenıent jáne sport basqarmasynyń uıytqy bolýymen ótip jatqan jarysqa 6 jastan 50 jas aralyǵyndaǵy parasportshylar qatysýda.
«Búginde elimizde paralımpıadalyq sport túri jaqsy qarqynmen damýda. Bul turǵyda Úkimet pen mınıstrlik tarapynan tıisti sharalar qabyldanyp, qoldaý kórsetilýde. Sonyń biri búgin Qazaqstannyń parasport tarıhynda alǵash ret «Bochcha» sport túrinen qalalyq chempıonat ótýde. Buǵan barlyq sany 80 adam qatysyp jatyr, onyń 20 eresek adam, qalǵany balalar. Biz bul jarysqa daıyndyqty ótken jyldan bastap júrgizdik», - dedi «Bochcha» paralımpıadalyq sport federatsııasynyń prezıdenti Sultanbek Orynbasarov.
Onyń aıtýynsha, qurylǵanyna endi bir jyl bolatyn sport federatsııasynyń sportshylary aldaǵy ýaqytta atalǵan sport túrinen halyqaralyq jarystarǵa qatysý josparda bar, bul maqsatta daıyndyq jumystary da júrip jatyr.
«Bochcha» parasport túriniń basqadan ereksheligi, bul qolarbada otyratyn jandarǵa arnalǵan. Ózderińiz biletindeı qolarbada tańylǵan jandardyń qımyl qozǵalysy az, al bochcha belsendi dene qozǵalysyna arnalǵan. ıAǵnı, olar jarysyp qana qoımaı, dene jattyǵýlaryn jasaıdy. Chempıonat eki kezeńnen turady jeke jáne toptyq», - deıdi ol.
Qaladaǵy Paralımpıadalyq jattyǵý ortalyǵynda ótip jatqan saıys jeńimpazdary arnaıy kýbok jáne medaldarmen marapattalatyn bolady.
Aıta keteıik, bochcha - dáldilikke, boýlıng, petanka jáne boýlz oıyndar otbasyna jatatyn doppen oınalatyn oıyn. Bul sport túri alǵash ret 1984 jyly VII paralımpıadalyq oıyndar baǵdarlamasyna engizilgen. Bochcha ortalyq júıke júıesi zaqymdalýdyń aýyr túrleri kezdesetin jáne omyrtqa jaraqatyn alǵan oıynshylar arasynda keńinen taralǵan, ol denege, aǵzaǵa, kóńil kúıge jáne sana-sezimge oń áserin tıgizedi.
