Elimizde tuńǵysh ret ashyq júıeler jáne bultty esepteýler boıynsha ǵylymı-zertteý zerthanasy ashyldy

Qazaqstandaǵy birinshi jáne alǵashqy joba «Zerde» ınfokommýnıkatsııa holdıngi men «Huawei-Almaty» kompanııasynyń jáne Halyqaralyq aqparattyq tehnologııalar ýnıversıtetiniń birlesken jumysynyń nátıjesinde múmkin boldy.

"Zerthananyń negizgi qyzmeti - Open Source tehnologııalaryn paıdalaný arqyly «bultty esepteýler», «ashyq júıeler» baǵyttary boıynsha ǵylymı-zertteý jumystaryn ótkizýge, sonymen qatar, joǵaryda atalǵan baǵyttar boıynsha ІT-sheshimderdi zertteý men testileýge jáne ІT-mamandardy daıyndaýǵa baǵyttalady", - dedi Aqparattyq tehnologııa salasyndaǵy ǵylymı-tehnıkalyq damytý departamentiniń dırektory Baqytjan Bıtemirov.

«Zerde» ulttyq ınfokommýnıkatsııa holdıngi» AQ-nyń basqarma tóraǵasy Nurlan Izmaıylovtyń aıtýynsha, zerthananyń ashylýy elimizde "ashyq kodtar bazasyndaǵy "bultty esepteýler" jáne "ashyq júıeler" atymen tanymal aqparattyq komýnıkatsııalyq tehnologııalardyń jańa baǵyttaryn damytýǵa baǵyttalatyn bolady. "Bul júıeler búkil álemde qazirgi ýaqytta qarqyndy damý ústinde. Sondyqtan, olardy damytý kez kelgen memlekettik nemese kommertsııalyq qurylymnyń qyzmetine oń áserin tıgizedi dep sanaımyn. Bul sonymen qatar, qymbat jabdyqtar men baǵdarlamalyq qamtamasyz etýdi satyp alýǵa ketetin artyq shyǵyndardy joıýǵa, sondaı-aq, jalgerlik negizde paıdalanýshylarǵa barlyq qajet bolatyn ІT-resýrstarmen qamtamasyz etýge múmkindik beredi. Al, kadrlardy derbes túrde daıyndaý - elimizde ózimizdiń biliktiligi joǵary mamandarymyzdyń sanynyń artýyna yqpal etedi", - dedi ol zerthananyń ashylý saltanatynda.

Onyń pikirinshe, Halyqaralyq aqparattyq tehnologııalar ýnıversıteti bazasynda osyndaı zerthanany qurý memleket pen jeke sektor arasyndaǵy ózara yqpaldastyq mysaly ǵana emes, sonymen qatar, ınnovatsııalyq ekonomıkanyń jańa úlgisine ótý jolyndaǵy bilim júıesiniń úlgisi bolmaq.

Sharanyń ashylý saltanatyna QR Baılanys jáne aqparat mınıstrligi, QHR Bas konsýldyǵy, «Zerde» ulttyq ınfokommýnıkatsııa holdıngi» AQ jáne «Ulttyq ınnovatsııalar qory» ókilderi arnaıy qatysty.