Elimizde tuńǵysh «Bilim tarıhy» murajaıy ashyldy
ASTANA. QazAqparat - Búgin L.N.Gýmılev atyndaǵy Eýrazııa ulttyq ýnıversıtetinde tuńǵysh «Bilim tarıhy» mýzeıi ashyldy, dep habarlaıdy atalmysh oqý ornynyń baspasóz qyzmetinen.
Mýzeıdiń tusaýkeser rásimine Qazaqstan Respýblıkasy Premer-mınıstriniń orynbasary Gúlshara Ábdiqalyqova, Qazaqstan Respýblıkasynyń Bilim jáne ǵylym mınıstri Aslan Sárinjipov, keshegi Keńes Odaǵy kezinde respýblıkanyń oqý-aǵartý salasyn on jyldan asa basqarǵan Qojahmet Balahmetov, parlament depýtattary, ǵylym jáne qoǵam qaıratkerleri qatysty.
Tusaýkeser rásiminde jazýshy Ádı Sháripovtiń zaıyby Klara Myńjasarova L.N.Gýmılev atyndaǵy EUÝ-niń rektory Erlan Sydyqovqa murajaıǵa qoıýǵa qalamgerdiń jeke muraǵatynan qundy jádigerlerdi tapsyrdy. Sondaı-aq oǵan professor Kemal Aqyshevtyń kompasy, Abaı Qunanbaevtyń 1939 jyly shyqqan jınaǵy, Ahmet Baıtursynulynyń latyn árpimen basylǵan «Álipbıi», Ybyraı Altynsarınniń alǵashqy hrestomatııasy,1922 jyly Orynborda ashylǵan qazaq qyzdarynyń bilim kýrsy týraly fotosýretter, jalpy 905 jádiger qoıylyp otyr. Buǵan qosa Dıhan Hamzabekuly, Sultanhan Aqquly, Nurdáýlet Belekuly sııaqty ǵalymdardyń jeke qorynan jáne Semeı ólketaný murajaıynan, Y.Altynsarın atyndaǵy Arqalyq pedagogıkalyq ınstıtýtynan alynǵan qundy kitaptar men fotosýretter de bar.
San myń jyldyń shejiresi jazylǵan «Bilim tarıhynyń» jańa beti ashylyp otyr. Murajaı QR Bilim jáne ǵylym mınıstri Aslan Sárinjipov pen EUÝ-diń rektory Erlan Sydyqovtyń ıdeıalary boıynsha jasaqtaldy. "Elimizde bilim tarıhyna arnalǵan murajaı joq. Sondyqtan aqparat berý úshin osyndaı mýzeı ashý týraly oı keldi. Búgin sol ıdeıany L.N.Gýmılev atyndaǵy Eýrazııa ulttyq ýnıversıtetimen birlesip júzege asyryp otyrmyz", - dedi mınıstr Aslan Sárinjipov. Mýzeıdi ashýdaǵy maqsat - ulan-ǵaıyr aımaqta ǵasyrlar boıy qalyptasyp, saqtalǵan mol mádenı-aǵartýshylyq qundylyqtardy jınaqtaı otyryp, jurtshylyq nazaryna usyný jáne jastardyń boıyna izgilikti, bilimge qushtarlyqty, tarıhqa qurmet pen maqtanysh sezimin darytý.
