Elimizde tumaýǵa qarsy ekpe jumystary osy aptada aıaqtalady
NUR-SULTAN. QazAqparat – Densaýlyq saqtaý mınıstri Alekseı Tsoı 15 qyrkúıekten bastap búginge deıin 1,8 mln adamǵa tumaýǵa qarsy vaktsına salynǵanyn málim etti, dep habarlaıdy QazAqparat tilshisi.
«Elimizde maýsymdyq ınfektsııalardyń qarqyny men koronavırýs ınfektsııasynyń jańa tolqynyn basý úshin 15 qyrkúıekten bastap tumaýǵa qarsy maqsatty toptarǵa ekpe júrgizilip jatyr. Ol úshin tumaýǵa qarsy 2,2 mln vaktsına satylyp alyndy. Bul – jalpy halyqtyń 11 paıyzyn ekpe jumystarymen qamtýǵa múmkindik berdi. Qazirgi ýaqytta 1,8 mln adam vaktsınadan ótti. Osy aptanyń sońynda vaktsına jumystary tolyǵymen aıaqtalady», - dedi Alekseı Tsoı OKQ-da ótken baspasóz máslıhatynda.
Eske sala ketsek buǵan deıin Alekseı Tsoı koronavırýs juqtyrý deńgeıi qaıta órshigen álem elderin ataǵan bolatyn.
